Poetry Explorer- Classic Contemporary Poetry, THE RIGS O' BARLEY, by ROBERT BURNS


Poetry Explorer

Classic and Contemporary Poetry

THE RIGS O' BARLEY, by                 Poet Analysis     Poet's Biography
First Line: It was upon a lammas night
Last Line: Corn rigs, an' barley rigs, &c.
Variant Title(s): Corn Riggs
Subject(s): Love


It was upon a Lammas night,
When corn rigs are bonnie,
Beneath the moon's unclouded light,
I held awa to Annie;
The time flew by, wi' tentless heed,
Till, 'tween the late and early,
Wi' sma' persuasion she agreed
To see me thro' the barley.

Corn rigs, an' barley rigs,
An' corn rigs are bonnie:
I'll ne'er forget that happy night,
Amang the rigs wi' Annie.

The sky was blue, the wind was still,
The moon was shining clearly;
I set her down, wi' right good will,
Amang the rigs o' barley:
I ken't her heart was a' my ain;
I lov'd her most sincerely;

I kiss'd her owre and owre again,
Amang the rigs o' barley.
Corn rigs, an' barley rigs, &c.

I lock'd her in my fond embrace;
Her heart was beating rarely:
My blessings on that happy place,
Amang the rigs o' barley!
But by the moon and stars so bright,
That shone that hour so clearly!
She aye shall bless that happy night
Amang the rigs o' barley.
Corn rigs, an' barley rigs, &c.

I hae been blythe wi' comrades dear;
I hae been merry drinking;
I hae been joyfu' gath'rin gear;
I hae been happy thinking:
But a' the pleasures e'er I saw,
Tho' three times doubl'd fairly,
That happy night was worth them a',
Amang the rigs o' barley.
Corn rigs, an' barley rigs, &c.





Discover our Poem Explanations and Poet Analyses!


Other Poems of Interest...
Home: PoetryExplorer.net