Poetry Explorer- Classic Contemporary Poetry, THE FARMER'S INGLE, by ROBERT FERGUSSON


Poetry Explorer

Classic and Contemporary Poetry

THE FARMER'S INGLE, by                 Poet Analysis     Poet's Biography
First Line: Whan gloaming grey out owr the welkin keeks
Last Line: And a lang lasting train o' peaceful hours succeed.
Alternate Author Name(s): Ferguson, Robert
Subject(s): Farm Life; Mills & Millers; Winter; Agriculture; Farmers


Whan gloaming grey out owr the welkin keeks,
Whan Batie ca's his owsen to the byre,
Whan Thrasher John, sair dung, his barn-door steeks,
And lusty lasses at the dighting tire:
What bangs fu leal the e'enings coming cauld,
And gars snaw-tappit winter freeze in vain;
Gars dowie mortals look baith blyth and bauld,
Nor fley'd wi a' the poortith o' the plain --
Begin, my Muse, and chant in hamely strain.

Frae the big stack, weel winnow't on the hill,
Wi divets theekit frae the weet and drift,
Sods, peats, and heath'ry trufs the chimley fill,
And gar their thick'ning smeek salute the lift;
The gudeman, new come hame, is blyth to find,
Whan he out owr the halland flings his een,
That ilka turn is handled to his mind,
That a' his housie looks sae cosh and clean;
For cleanly house loos he, tho' e'er sae mean.

Weel kens the gudewife that the pleughs require
A heartsome meltith, and refreshing synd
O' nappy liquor, owr a bleezing fire:
Sair wark and poortith downa weel be join'd.
Wi butter'd bannocks now the girdle reiks,
I' the far nook the bowie briskly reams;
The readied kail stand by the chimley cheeks,
And had the riggin het wi welcome steams,
Whilk than the daintiest kitchen nicer seems.

Frae this lat gentler gabs a lesson lear;
Wad they to labouring lend an eident hand,
They'd rax fell strang upo' the simplest fare,
Nor find their stamacks ever at a stand.
Fu hale and healthy wad they pass the day,
At night in calmest slumbers dose fu sound,
Nor doctor need their weary life to spae,
Nor drogs their noddle and their sense confound,
Till death slip sleely on, and gie the hindmost wound.

On siccan food has mony a doughty deed
By Caledonia's ancestors been done;
By this did mony wight fu weirlike bleed
In brulzies frae the dawn to set o' sun:
'Twas this that brac'd their gardies, stiff and strang,
That bent the deidly yew in ancient days,
Laid Denmark's daring sons on yird alang,
Gar'd Scottish thristles bang the Roman bays;
For near our crest their heads they doughtna raise.

The couthy cracks begin whan supper's owr,
The cheering bicker gars them glibly gash
O' simmer's showery blinks and winters sour,
Whase floods did erst their mailins' produce hash:
'Bout kirk and market eke their tales gae on,
How Jock woo'd Jenny here to be his bride,
And there how Marion, for a bastard son,
Upo' the cutty-stool was forc'd to ride,
The waefu scald o' our Mess John to bide.

The fient a cheep's amang the bairnies noo;
For a' their anger's wi their hunger gane:
Ay maun the childer, wi a fastin mou,
Grumble and greet, and make an unco mane,
In rangles round before the ingle's lowe:
Frae gudame's mouth auld warld tale they hear,
O' warlocks louping round the wirrikow,
O' ghaists that win in glen and kirk-yard drear,
Whilk touzles a' their tap, and gars them shak wi fear.

For weel she trous that fiends and fairies be
Sent frae the deil to fleetch us to our ill;
That kye hae tint their milk wi evil ee,
And corn been scowder'd on the glowing kill.
O mock na this, my friends! but rather mourn,
Ye in life's brawest spring wi reason clear,
Wi eild our idle fancies a' return,
And dim our dolefu days wi bairnly fear;
The mind's ay cradled whan the grave is near.

Yet thrift, industrious, bides her latest days,
Tho' age her sair dow'd front wi runcles wave,
Yet frae the russet lap the spindle plays,
Her e'enin stent reels she as weel's the lave.
On some feast-day, the wee-things buskit braw
Shall heeze her heart up wi a silent joy,
Fu cadgie that her head was up and saw
Her ain spun cleething on a darling oy,
Careless tho' death should make the feast her foy.

In its auld lerroch yet the deas remains,
Whare the gudeman aft streeks him at his ease,
A warm and canny lean for weary banes
O' lab'rers doil'd upo' the wintry leas:
Round him will baudrins and the colly come,
To wag their tail, and cast a thankfu ee
To him wha kindly flings them mony a crumb
O' kebbuck whang'd, and dainty fadge to prie;
This a' the boon they crave, and a' the fee.

Frae him the lads their morning counsel tak,
What stacks he wants to thrash, what rigs to till;
How big a birn maun lie on bassie's back,
For meal and multer to the thirling mill.
Neist the gudewife her hireling damsels bids
Glowr thro' the byre, and see the hawkies bound,
Take tent case Crummy tak her wonted tids,
And ca the laiglen's treasure on the ground,
Whilk spills a kebbuck nice, or yellow pound.

Then a' the house for sleep begin to grien,
Their joints to slack frae industry a while;
The leaden god fa's heavy on their een,
And haflins steeks them frae their daily toil:
The cruizy too can only blink and bleer,
The restit ingle's done the maist it dow;
Tacksman and cottar eke to bed maun steer,
Upo' the cod to clear the drumly pow,
Till wauken'd by the dawning's ruddy glow.

Peace to the husbandman and a' his tribe,
Whase care fells a' our wants frae year to year;
Lang may his sock and couter turn the gleyb,
And bauks o' corn bend down wi laded ear.
May Scotia's simmers ay look gay and green,
Her yellow har'sts frae scowry blasts decreed;
May a' her tenants sit fu snug and bien,
Frae the hard grip of ails and poortith freed,
And a lang lasting train o' peaceful hours succeed.





Discover our Poem Explanations and Poet Analyses!


Other Poems of Interest...
Home: PoetryExplorer.net