Poetry Explorer- Classic Contemporary Poetry, GLOAMIN' TIME, by WILLIAM MCQUEEN (1841-)


Poetry Explorer

Classic and Contemporary Poetry

GLOAMIN' TIME, by                    
First Line: I set me doon and think when the fire burns bricht
Last Line: And oor future will be blest whaure'er lies oor way.
Subject(s): Thought; Thinking


I SET me doon and think when the fire burns bricht,
For the rhymes they kind o' clink in the gloamin' licht,
When the darkness creeps aboon,
And the shadows gather roon,
As the day resigns the croon to the starry nicht.

Hoo ane minds o' things lang gane in the witching hour!
And strange mem'ries seize the brain wi' a giant pow'r,
Till the strongest drap a tear,
And the reckless quake wi' fear,
And far's nearer than the near in the heart's lone bow'r.

It's trying to the maist is the gloamin' licht;
For a' folks hae a ghaist that's no buried richt,
That will come withoot a ca',
And refuse to gang awa'
While the shadow's on the wa' -- though the fire burns bricht.

Yet the gloamin's but a blink -- it was meant to be sae,
And we mauna sit and think a' the livelang day.
We maun up and strive oor best,
Dae oor wark wi' cheerfu' zest,
And oor future will be blest whaure'er lies oor way.





Discover our Poem Explanations and Poet Analyses!


Other Poems of Interest...
Home: PoetryExplorer.net