Poetry Explorer- Classic Contemporary Poetry, "ON RICHARD, DUKE OF CORNWALL, BROTHER TO HENRY III", by ANONYMOUS


Poetry Explorer

Classic and Contemporary Poetry

"ON RICHARD, DUKE OF CORNWALL, BROTHER TO HENRY III", by                    
First Line: Sitteth alle stille and herkneth to me
Last Line: Tricchen shalt thou neuermore
Subject(s): "henry Iii, King Of England (1207-1272);lewes, Battle Of (1264);richard, Earl Of Cornwall (1209-1272);


Sitteth alle stille and herkneth to me!
the kyng of Alemaigne, bi mi leaute,
thritti thousent pound askede he
fforte make the pees in the countre,
ant so he dude more.
Richard, thah thou be euer trichard,
tricchen shalt thou neuermore.
Richard of Alemaigne whil that he was kyng,
he spende al is tresour opon swyuyng,
haueth he nout of Walingford o ferlyng;
let him habbe ase he brew, bale to dryng,
maugre Wyndesore.
Richard, thah thou be euer trichard,
tricchen shalt thou neuermore.
The kyng of Alemaigne wende do ful wel;
he saisede the mulne for a castel.
with hare sharpe swerdes he grounde the stel;
he wende that the sayles were mangonel,
to helpe Windesore.
Richard, thah thou be euer trichard,
tricchen shalt thou neuermore.
The kyng of Alemaigne gederede ys host,
makede him a castel of a mulne post,
wende with is pride ant is muchele bost,
brohte from Alemayne mony sori gost
to store Wyndesore.
Richard, thah thou be euer trichard,
tricchen shalt thou neuermore.
By God that is abouen ous he dude muche synne
that lette passen ouer see the erl of Warynne;
he hath robbed Engelond, the mores ant the fenne,
the gold ant the seluer, and yboren henne,
for loue of Wyndesore.
Richard, thah thou be euer trichard,
tricchen shalt thou neuermore.
Sire Simond de Mountfort hath suore bi ys chyn
heuede he nou here the erl of Waryn
shulde he neuer more come to is yn,
ne with sheld ne with spere ne with other gyn,
to help of Wyndesore.
Richard, thah thou be euer trichard,
tricchen shalt thou neuermore.
Sire Simond de Montfort hath suore bi ys top
heuede he nou here sire Hue de Bigot
al he shulde quite here tuelfmoneth scot,
shulde he neuer more with his fot pot
to helpe Wyndesore.
Richard, thah thou be euer trichard,
tricchen shalt thou neuermore.
Be the luef, be the loht, sire Edward,
thou shalt ride sporeles o thy lyard
al the ryhte way to Douere ward;
shalt thou neuermore breke foreward,
ant that reweth sore.
Edward thou dudest ase a shreward,
forsake thyn emes lore.
Richard, thah thou be euer trichard,
tricchen shalt thou neuermore.







Discover our Poem Explanations and Poet Analyses!


Other Poems of Interest...
Home: PoetryExplorer.net