Classic and Contemporary Poetry
HUGHIE'S WINTER EXCUSE FOR A DRAM, by JAMES LOGIE ROBERTSON First Line: Fra whaur ye hing, my cauldrife frien' Alternate Author Name(s): Haliburton, Hugh | ||||||||
FRA whaur ye hing, my cauldrife frien', Your blue neb owre the lowe, A snawy nichtcap may be seen Upon Benarty's pow; An' snaw upon the auld gean stump, Whas' frostit branches hang Oot-owre the dyke abune the pump That's gane clean aff the fang. The pump that half the toun's folk ser'd, It winna gie a jaw, An' rouch, I ken, sall be your beard Until there comes a thaw! Come, reenge the ribs, an' let the heat Doun to oor tinglin' taes; Clap on a gude Kinaskit peat An' let us see a blaze. An' since o' watter we are scant Fess ben the barley-bree - A nebfu' baith we sanna want To wet oor whistles wi'! Noo let the winds o' Winter blaw Owre Scotland's hills an' plains, It maitters nocht to us ava - We've simmer in oor veins! The pooers o' Nature, wind an' snaw, Are far abune oor fit, But while we scoog them, let them blaw; We'll aye hae simmer yet. An' sae wi' Fortune's blasts, my frien', - They'll come an' bide at will, But we can scoog ahint a screen An' jook their fury still. Then happy ilka day that comes, An' glorious ilka nicht; The present doesna fash oor thooms, The future needna fricht! The future! - man, there's joys in store, An' joys ye little ken, The warld has prov'd them sweet afore, The warld will again! The lasses, min! the dearest gift An' treasure time can gie - Here's to the love that lichts the lift O' woman's witchin' ee! An' vainly till that licht expire Should storm or winter low'r - It's sune aneuch to seek the fire When simmer days are owre! *Note. - Kinaskit, as its inhabitants pronounce Kinnesswood, is a small village at the foot of the Lomond Hill and not far from Lochleven. In its neighborhood is a small peat moss, from which the surrounding villages and farm-towns used to be supplied with fuel. | Discover our Poem Explanations and Poet Analyses!Other Poems of Interest...THE WHITE WINTER - HUGHIE SNAWED UP by JAMES LOGIE ROBERTSON DAVE (SC. DAPHNIS) by JAMES LOGIE ROBERTSON SCHULE LADDIE'S LAMENT ON THE LATENESS O' THE SEASON by JAMES LOGIE ROBERTSON HUGHIE REFUSES TO EMIGRATE by JAMES LOGIE ROBERTSON HUGHIE'S ADVICE TO HIS BROTHER JOHN by JAMES LOGIE ROBERTSON HUGHIE'S INDIGNATION AT THE CONDUCT OF THE ... ELDER by JAMES LOGIE ROBERTSON HUGHIE'S MONUMENT by JAMES LOGIE ROBERTSON HUGHIE TAKES HIS EASE IN HIS INN by JAMES LOGIE ROBERTSON MORNING - THE MOUNTAIN FAMILY AT THEIR DEVOTIONS by JAMES LOGIE ROBERTSON MOUNTAIN LAUREATE by JAMES LOGIE ROBERTSON |
|