THE wind may blaw the lee-lang way And aye the lift be mirk an' grey, And deep the moss an' steigh the brae Where a' maun gang There's still an hoor in ilka day For luve and sang. And canty hearts are strangely steeled, By some dikeside they'll find a bield, Some couthy neuk by muir or field They're sure to hit, Where, frae the blatherin' wind concealed, They'll rest a bit. An' weel for them if kindly fate Send ower the hills to them a mate; They'll crack a while o' kirk an' State, O' yowes an' rain: An' when it's time to tak' the gate, Tak' ilk his ain. -- Sic neuk beside the southern sea I soucht -- sic place o' quiet lee Frae a' the winds o' life. To me, Fate, rarely fair, Had set a freendly company To meet me there. Kindly by them they gart me sit, An' blythe was I to bide a bit. Licht as o' some hame fireside lit My life for me. -- Ower early maun I rise an' quit This happy lee. | Discover our Poem Explanations and Poet Analyses!Other Poems of Interest...NATURA NATURANS by ARTHUR HUGH CLOUGH MADRIGAL: 1 by WILLIAM DRUMMOND OF HAWTHORNDEN A LITTLE DUTCH GARDEN by HARRIET WHITNEY DURBIN THE SLEEPER by EDGAR ALLAN POE ANECDOTE OF THE JAR by WALLACE STEVENS |