It's rainin'. Weet's the gairden sod, Weet the lang roads whaur gangrels plod A maist unceevil thing o' God In mid July -- If ye'll just curse the sneckdraw, dod! An' sae wull I! He's a braw place in Heev'n, ye ken, An' lea's us puir, forjaskit men Clamjamfried in the but and ben He ca's the earth -- A wee bit inconvenient den No muckle worth; An' whiles, at orra times, keeks out, Sees what puir mankind are about; An' if He can, I've little doubt, Upsets their plans; He hates a' mankind, brainch and root, An' a' that's man's. An' whiles, whan they tak heart again, An' life i' the sun looks braw an' plain, Doun comes a jaw o' droukin' rain Upon their honours -- God sends a spate outower the plain, Or mebbe thun'ers. Lord safe us, life's an unco thing! Simmer an' Winter, Yule an' Spring, The damned, dour-heartit seasons bring A feck o' trouble. I wadnae try't to be a king -- No, nor for double. But since we're in it, willy-nilly, We maun be watchfu,' wise an' skilly, An' no mind ony ither billy, Lassie nor God. But drink -- that's my best counsel till'e: Sae tak the nod. | Discover our Poem Explanations and Poet Analyses!Other Poems of Interest...IN HONOR OF TAFFY TOPAZ by CHRISTOPHER DARLINGTON MORLEY VERLAINE by EDWIN ARLINGTON ROBINSON GOOD FRIDAY (1) by CHRISTINA GEORGINA ROSSETTI ASTRAEA by JOHN GREENLEAF WHITTIER SIX TOWN ECLOGUES: SATURDAY; THE SMALL-POX by MARY WORTLEY MONTAGU |