Poetry Explorer- Classic Contemporary Poetry, TO A LOUSE, ON SEEING ONE ON A LADY'S BONNET AT CHURCH, by ROBERT BURNS


Poetry Explorer

Classic and Contemporary Poetry

TO A LOUSE, ON SEEING ONE ON A LADY'S BONNET AT CHURCH, by                 Poet Analysis     Poet's Biography
First Line: Ha! Whare ye gaun, ye crowlin ferlie!
Last Line: And ev'n devotin!
Subject(s): Insects; Lice; Bugs


HA! whare ye gaun, ye crawlin' ferlie?
Your impudence protects you sairly:
I canna say but ye strunt rarely
Owre gauze an' lace;
Though, faith! I fear ye dine but sparely
On sic a place.
Ye ugly, creepin', blastit wonner,
Detested, shunned by saunt an' sinner,
How dare you set your fit upon her,
Sae fine a lady?
Gae somewhere else, and seek your dinner
On some poor body.
Swith, in some beggar's haffet squattle;
There ye may creep and sprawl and sprattle
Wi' ither kindred, jumping cattle,
In shoals and nations:
Whare horn nor bane ne'er daur unsettle
Your thick plantations.
Now haud you there, ye're out o' sight,
Below the fatt'rels, snug an' tight;
Na, faith ye yet! ye'll no be right
Till ye've got on it,
The very tapmost tow'ring height
O' Miss's bonnet.
My sooth; right bauld ye set your nose out,
As plump and gray as ony grozet;
O for some rank, mercurial rozet,
Or fell, red smeddum!
I'd gie you sic a hearty dose o't,
Wad dress your droddum!
I wad na been surprised to spy
You on an auld wife's flannen toy;
Or aiblins some bit duddie boy,
On 's wyliecoat;
But Miss's fine Lunardi, fie!
How daur ye do't?
O Jenny, dinna toss your head,
An' set your beauties a' abread!
Ye little ken what cursed speed
The blastie's makin'!
Thae winks and finger-ends, I dread,
Are notice takin'!
O wad some power the giftie gie us
To see oursel's as others see us!
It wad frae monie a blunder free us,
And foolish notion:
What airs in dress an' gait wad lea'e us,
And ev'n devotin!




Discover our Poem Explanations and Poet Analyses!


Other Poems of Interest...
Home: PoetryExplorer.net