Poetry Explorer- Classic Contemporary Poetry, THE NABOB, by SUSANNA BLAMIRE


Poetry Explorer

Classic and Contemporary Poetry

THE NABOB, by                     Poet's Biography
First Line: When silent time, wi' lightly foot
Last Line: That minds ye o' lang syne.
Alternate Author Name(s): Muse Of Cumberland; Sukey, Miss
Subject(s): Homecoming; Scotland


WHEN silent time, wi' lightly foot,
Had trod on thirty years,
I sought again my native land
Wi' mony hopes and fears.
Wha kens gin the dear friends I left
May still continue mine?
Or gin I e'er again shall taste
The joys I left langsyne?

As I drew near my ancient pile,
My heart beat a' the way;
Ilk place I passed seemed yet to speak
O' some dear former day: --
Those days that followed me afar,
Those happy days o' mine,
Whilk made me think the present joys
A' naething to langsyne.

The ivied tower now met my eye,
Where minstrels used to blaw;
Nae friend stepped forth wi' open hand.
Nae weel-kenned face I saw,
Till Donald tottered to the door,
Wham I left in his prime,
And grat to see the lad return
He bore about langsyne.

I ran to ilka dear friend's room,
As if to find them there;
I knew where ilk ane used to sit,
And hung o'er mony a chair;
Till soft remembrance threw a veil
Across these een o' mine --
I closed the door, and sobbed aloud,
To think on auld langsyne.

Some pensy chiels, a new-sprung race,
Wad next their welcome pay,
Wha shuddered at my Gothic wa's,
And wished my groves away.
'Cut, cut,' they cried, 'those aged elms,
Lay low yon mournfu' pine! '
'Na, na! our fathers' names grow there,
Memorials o' langsyne.'

To wean me fra these waefu' thoughts
They took me to the town,
But sair on ilka weel-kenned face
I missed the youthfu' bloom.
At balls they pointed to a nymph
Wham a' declared divine:
But sure her mother's blushing cheeks
Were fairer far langsyne!

In vain I sought in music's sound
To find that magic art
Which oft in Scotland's ancient lays
Has thrilled through a' my heart.
The sang had mony an artfu' turn:
My ear confessed 'twas fine;
But missed the simple melody
I listened to langsyne.

Ye sons to comrades o' my youth,
Forgi'e an auld man's spleen,
Wha midst your gayest scenes still mourns
The days he ance has seen.
When time has passed, and seasons fled,
Your hearts will feel like mine;
And aye the sang will maist delight
That minds ye o' lang syne.





Discover our Poem Explanations and Poet Analyses!


Other Poems of Interest...
Home: PoetryExplorer.net