Classic and Contemporary Poetry
LINES ON AN INTERVIEW WITH LORD DAER, by ROBERT BURNS Poet Analysis Poet's Biography First Line: This wot ye all whom it concerns Last Line: For he but meets a brother. | ||||||||
This wot ye all whom it concerns, I, Rhymer Robin, alias Burns, October twenty-third, A ne'er-to-be-forgotten day, Sae far I sprackl'd up the brae, I dinner'd wi' a Lord. I've been at drucken writers' feasts, Nay, been bitch-fou 'mang godly priests -- Wi' rev'rence be it spoken! -- I've even join'd the honour'd jorum, When mighty Squireships of the quorum, Their hydra drouth did sloken. But wi' a Lord! -- stand out my shin, A Lord-a Peer -- an Earl's son! Up higher yet, my bonnet An' sic a Lord! -- lang Scoth ells twa, Our Peerage he o'erlooks them a', As I look o'er my sonnet. But O for Hogarth's magic pow'r! To show Sir Bardie's willyart glow'r, An' how he star'd and stammer'd, When, goavin, as if led wi' branks, An' stumpin on his ploughman shanks, He in the parlour hammer'd. I sidying shelter'd in a nook, An' at his Lordship steal't a look, Like some portentous omen; Except good sense and social glee, An' (what surpris'd me) modesty, I marked nought uncommon. I watch'd the symptoms o' the Great, The gentle pride, the lordly state, The arrogant assuming; The fient a pride, nae pride had he, Nor sauce, nor state, that I could see, Mair than an honest ploughman. Then from his Lordship I shall learn, Henceforth to meet with unconcern One rank as weel's another; Nae honest, worthy man need care To meet with noble youthful Daer, For he but meets a brother. | Discover our Poem Explanations and Poet Analyses!Other Poems of Interest...A POET'S WELCOME TO HIS LOVE-BEGOTTEN DAUGHTER by ROBERT BURNS A RED, RED ROSE by ROBERT BURNS ADDRESS TO A HAGGIS by ROBERT BURNS ADDRESS TO THE UNCO GUID, OR THE RIGIDLY RIGHTEOUS by ROBERT BURNS AULD LANG SYNE by ROBERT BURNS CA' THE YOWES TO THE KNOWES by ROBERT BURNS |
|