Poetry Explorer- Classic Contemporary Poetry, BALLADE OF THE FOREST IN SUMMER, by PATRICK REGINALD CHALMERS


Poetry Explorer

Classic and Contemporary Poetry

BALLADE OF THE FOREST IN SUMMER, by                    
First Line: Fra cruachan tae aberdeen
Last Line: It's summer noo in a' the hills!
Subject(s): Forests; Summer; Woods


FRA Cruachan tae Aberdeen
The hinds'll move their calfies soon
Up frae the bracken's bonnie green
To yon blue heights that float aboon;
Nae snaws the tops an' corries croon;
Crags whaur the eagle lifts his kills
Blink i' the gowden efternoon;
It's summer noo in a' the hills!

The heather sleeps frae morn till e'en
Braw in her reed-an'-purple goon;
Sax weeks it wants or stags be clean
An' gang wi thickenin' manes an' broun
Waitin' the cauld October moon
When a' the roarin' brae-face fills—
Ye've heard yon wild, wanchancy tune?
It's summer noo in a' the hills!

Yet blaws a soupin' breeze an' keen;
We're wearit for it whiles in toun,
An' I wad be whaur I hae been
In Autumn's blast or heats o' June
Up on the quiet forest groun',
Friens wi' the sun, or shoor that chills,
Watchin' the beasts gang up an' doon;
It's summer noo in a' the hills!

ENVOY

Mountains o' deer, ye ca' a loon
Fra streets an' sic-like stoury ills
Wi' thankfu' heart an' easy shoon;
It's summer noo in a' the hills!





Discover our Poem Explanations and Poet Analyses!


Other Poems of Interest...
Home: PoetryExplorer.net