Poetry Explorer- Classic Contemporary Poetry, THE LEGEND OF GOOD WOMEN: 6. THE LEGEND OF ADRIADNE, by GEOFFREY CHAUCER



Poetry Explorer

Classic and Contemporary Poetry

THE LEGEND OF GOOD WOMEN: 6. THE LEGEND OF ADRIADNE, by                 Poet Analysis     Poet's Biography
First Line: Juge infernal, mynos, of crete king
Last Line: His trewe love. The devil quyte him his wyle!


Juge Infernal, Minos, of Crete king,
Now cometh thy lot, now comestow on the ring;
Nat for thy sake only wryte I this storie,
But for to clepe agein unto memorie
Of Theseus the grete untrouthe of love;
For which the goddes of the heven above
Ben wrothe, and wreche han take for thy sinne.
Be reed for shame! now I thy lyf beginne.
Minos, that was the mighty king of Crete,
That hadde an hundred citees stronge and grete,
To scole [school] hath sent his sone Androgeus,
To Athenes; of the whiche hit happed thus,
That he was slayn, lerning philosphye,
Right in that citee, nat but for envye.
The grete Minos, of the whiche I speke,
His sones deeth is comen for to wreke;
Alcathoe he bisegeth harde and longe,
But natheles the walles be so stronge,
And Nisus, that was king of that citee,
So chivalrous, that litel dredeth he;
Of Minos or his ost [army] took he no cure,
Til on a day befel an aventure,
That Nisus doghter stood upon the wal,
And of the sege saw the maner al,
So happed hit, that, at a scarmishing,
She caste her herte upon Minos the king,
For his beautee and for his chivalrye,
So sore, that she wende for to dye.
And, shortly of this proces for to pace,
She made Minos winnen thilke [that] place,
So that the citee was al at his wille,
To saven whom him list, or elles spille;
But wikkedly he quitte her kindenesse,
And let her drenche in sorowe and distresse,
Nere that the goddes hadde of her pite;
But that tale were to long as now for me.
Athenes wan this king Minos also,
And Alcathoe and other tounes mo;
And this the effect, that Minos hath so driven
Hem of Athenes, that they mote him yiven [give]
Fro yere to yere her owne children dere
For to be slayn, as ye shul after here.
This Minos hath a monstre, a wikked beste,
That was so cruel that, without areste,
Whan that a man was broght in his presence,
He wolde him ete, ther helpeth no defence.
And every thridde [third] yeer, with-outen doute,
They casten lot, and, as hit com aboute
On riche, on pore, he moste his sone take,
And of his child he moste present make
Unto Minos, to save him or to spille,
Or lete his beste devoure him at his wille.
And this hath Minos don, right in despyt;
To wreke his sone was set al his delyt,
And maken hem of Athenes his thral
Fro yere to yere, whyl that he liven shal;
And home he saileth whan this toun is wonne.
This wikked custom is so longe y-ronne [run]
Til that of Athenes king Egeus
Mot sende his owne sone, Theseus,
Sith that the lot is fallen him upon,
To be devoured, for grace is ther non.
And forth is lad this woful yonge knight
Unto the court of king Minos ful right,
And in a prison, fetered, cast is he
Til thilke [that] tyme he sholde y-freten be.
Wel maystow wepe, O woful Theseus,
That art a kinges sone, and dampned thus.
Me thinketh this, that thou were depe y-holde
To whom that saved thee fro cares colde!
And now, if any woman helpe thee,
Wel oughtestow her servant for to be,
And been her trewe lover yeer by yere!
But now to come ageyn to my matere.
The tour, ther as this Theseus is throwe
Doun in the botom derke and wonder lowe,
Was joynynge in the walle to a foreyne;
And hit was longing to the doghtren tweyne
Of king Minos, that in here chambres grete
Dwelten above, toward the maister-strete,
In mochel mirthe, in joy and in solas.
Not I nat how, hit happed ther, per cas,
As Theseus compleyned him by nighte,
The kinges doghter, Adrian that highte,
And eek [also] her suster Phedra, herden al
His compleyning, as they stode on the wal
And lokeden upon the brighte mone;
Hem leste nat to go to bedde sone.
And of his wo they had compassioun;
A kinges sone to ben in swich [such] prisoun
And be devoured, thoughte hem gret pitee.
Than Adrian spak to her suster free,
And seyde, "Phedra, leve suster dere,
This woful lordes sone may ye nat here,
How pitously compleyneth he his kin,
And eek [also] his pore estat that he is in,
And gilteless? now certes, hit is routhe!
And if ye wol assenten, by my trouthe,
He shal be holpen, how so that we do!"
Phedra answerde, "Ywis [surely], me is as wo
For him as ever I was for any man;
And, to his help, the beste reed I can
Is that we doon the gayler prively
To come, and speke with us hastily,
And doon this woful man with him to come.
For if he may this monstre overcome,
Than were he quit; ther is noon other bote.
Lat us wel taste him at his herte-rote [source],
That, if so be that he a wepen have,
Wher that he dar, his lyf to kepe and save,
Fighten with this fend, and him defende.
For, in the prison, ther he shal descende,
Ye wite wel, that the beste is in a place
That nis nat derk, and hath roum eek [also] and space
To welde an ax or swerd or staf or knyf,
So that, me thinketh, he sholde save his lyf;
If that he be a man, he shal do so.
And we shul make him balles ek also
Of wexe and towe, that, whan he gapeth faste,
Into the bestes throte he shal hem caste
To slake his hunger and encombre his teeth;
And right anon, whan that Theseus seeth
The beste achoked, he shal on him lepe
To sleen him, or they comen more to-hepe.
This wepen shal the gayler, or that tyde,
Ful privily within the prison hyde;
And, for the hous is crinkled to and fro,
And hath so queinte weyes for to go --
For hit is shapen as the mase is wroght --
Therto have I a remedie in my thoght,
That, by a clewe of twyne, as he hath goon [proceed],
The same wey he may returne anoon [at once],
Folwing alwey the threed, as he hath come.
And, what that he this beste hath overcome,
Then may he fleen awey out of this drede,
And eek [also] the gayler may he with him lede,
And him avaunce at home in his contree,
Sin that so greet a lordes sone is he.
This is my reed, if that he dar hit take."
What sholde I lenger sermoun of hit make?
The gayler cometh, and with him Theseus.
And whan thise thinges been acorded thus,
Adoun sit Theseus upon his knee: --
"The righte lady of my lyf," quod he,
"I, sorweful man, y-dampned to the deeth,
Fro yow, whyl that me lasteth lyf or breeth,
I wol nat twinne, after this aventure,
But in your servise thus I wol endure,
That, as a wrecche unknowe, I wol yow serve
For ever-mo, til that myn herte sterve.
Forsake I wol at home myn heritage,
And, as I seide, ben of your court a page,
If that ye vouche-sauf that, in this place,
Ye graunte me to han so gret a grace
That I may han nat but my mete and drinke;
And for my sustenance yit wol I swinke,
Right as yow list, that Minos ne no wight --
Sin that he saw me never with eyen sight --
Ne no man elles, shal me conne espye;
So slyly and so wel I shal me gye,
And me so wel disfigure and so lowe,
That in this world ther shal no man me knowe,
To han my lyf, and for to han presence
Of yow, that doon to me this excellence.
And to my fader shal I senden here
This worthy man, that is now your gaylere,
And, him to gwerdone, that he shal wel be
Oon of the grettest men of my contree.
And yif [if] I dorste seyn [seen], my lady bright,
I am a kinges sone, and eek [also] a knight;
As wolde god, yif [if] that hit mighte be
Ye weren in my contree, alle three,
And I with yow, to bere yow companyee,
Than shulde ye seen yif [if] that I ther-of lye!
And, if I profre yow in low manere
To ben your page and serven yow right here,
But I yow serve as lowly in that place,
I prey to Mara to yiveke a grace
That shames deeth on me ther mote falle,
And deeth and povert to my frendes alle;
And that my spirit by nighte mote go
After my deeth, and walke to and fro;
That I mote of a traitour have a name,
For which my spirit go, to do me shame!
And yif [if] I ever claime other degree,
But-if ye vouche-sauf to yive hit me,
As I have seid, of shames deeth I deye!
And mercy, lady! I can nat elles seye!"
A seemly knight was Theseus to see,
And yong, but of a twenty yeer and three;
But who-so hadde y-seyn [seen] his countenaunce,
He wolde have wept, for routhe of his penaunce;
For which this Adriane in this manere
Answerde to his profre and to his chere.
"A kinges sone, and eek [also] a knight," quod she,
"To been my servant in so low degree,
God shilde hit, for the shame of women alle!
And leve me never swich [such] a cas befalle!
But sende yow grace and sleighte of herte also,
Yow to defende and knightly sleen your fo,
And leve herafter that I may yow finde
To me and to my suster here so kinde,
That I repente nat to give yow lyf!
Yit were hit better that I were your wyf,
Sin that ye been as gentil born as I,
And have a reaume, nat but faste by,
Then that I suffred giltles yow to sterve,
Or that I let yow as a page serve;
Hit is not profit, as unto your kinrede;
But what is that that man nil do for drede?
And to my suster, sin that hit is so
That she mot goon [proceed] with me, if that I go,
Or elles suffre deeth as wel as I,
That ye unto your sone as trewely
Doon her be wedded at your home-coming.
This is the fynal ende of al this thing;
Ye swere hit heer, on al that may be sworn."
"Ye, lady myn," quod he, "or elles torn
Mote I be with the Minotaur to-mowre [morning]!
And haveth her-of my herte-blood to borwe,
Yif [if] that ye wile; if I had knyf or spere,
I wolde hit leten out, and ther-on swere,
For than at erst I wot ye wil me leve.
By Mars, that is the cheef of my bileve,
So that I mighte liven and nat faile
To-mowre [morning] for tacheve my bataile,
I nolde never fro this place flee,
Til that ye shuld the verray preve see.
For now, if that the sooth I shal yow say,
I have y-loved yow ful many a day,
Thogh ye ne wiste hit nat, in my contree.
And aldermost desyred yow to see
Of any erthly living creature;
Upon my trouthe I swere, and yow assure,
Thise seven yeer I have your servant be;
Now have I yow, and also have ye me,
My dere herte, of Athenes duchesse!"
This lady smyleth at his stedfastnesse,
And at his hertly wordes, and his chere,
And to her suster seide in this manere,
Al softely, "now, suster myn," quod she,
"Now be we duchesses, bothe I and ye,
And sikered to the regals of Athenes,
And bothe her-after lykly to be quenes,
And saved fro his deeth a kinges sone,
As ever of gentil women is the wone
To save a gentil man, emforth here might,
In honest cause, and namely in his right.
Me thinketh no wight oghte her-of us blame,
Ne beren us ther-for an evel name."
And shortly of this matere for to make
This Theseus of her hath leve y-take,
And every point performed was in dede
As ye have in this covenant herd me rede.
His wepen, his clew, his thing that I have said,
Was by the gayler in the hous y-laid
Ther as this Minotaur hath his dwelling,
Right faste by the dore, at his entring.
And Theseus is lad unto his deeth,
And forth un-to this Minotaur he geeth,
And by the teching of this Adriane
He overcom this beste, and was his bane;
And out he cometh by the clewe again
Ful prevely, whan he this beste hath slain;
And by the gayler geten hath a barge,
And of his wyves tresor gan hit charge,
And took his wyf, and eek [also] her suster free,
And eek [also] the gayler, and with hem alle three
Is stole awey out of the lond by nighte,
And to the contre of Ennopye him dighte
Ther as he had a frend of his knowinge.
Ther fasten they, ther dauneen they and singe;
And in his armes hath this Adriane,
That of the beste hath kept him from his bane;
And gat him ther a newe barge anoon [at once],
And of his contree-folk a ful gret woon,
And taketh his leve, and hoomward saileth he.
And in an yle, amid the wilde see,
Ther as ther dwelte creature noon
Save wilde bestes, and that ful many oon,
He made his ship a-londe for to sette;
And in that yle half a day he lette,
And seide, that on the lond he moste him reste.
His mariners han doon right as him leste;
And, for to tellen shortly in this cas,
Whan Adriane his wyf a-slepe was,
For that her suster fairer was than she,
He taketh her in his hond, and forth goth he
To shippe, and as a traitour stal his way
Whyl that this Adriane a-slepe lay,
And to his contree-ward he saileth blyve --
A twenty devil way the wind him dryve! --
And fond his fader drenched in the see.
Me list no more to speke of him, parde;
Thise false lovers, poison be here bane!
But I wol turne again to Adriane
That is with slepe for werinesse atake.
Ful sorwefully her herte may awake.
Allas! for thee my herte hath now pite!
Right in the dawning awaketh she,
And gropeth in the bedde, and fond right noght.
"Allas!" quode she, "that ever I was wroght!
I am betrayed!" and her heer to-rente,
And to the strand bar-fot faste she wente,
And cryed, "Theseus! myn herte swete!
Wher be ye, that I may nat with yow mete,
And mighte thus with bestes been y-slain?"
The holwe [hollow] rokkes [rocks] answerde her again;
No man she saw, and yit shyned the mone,
And hye upon a rokke [rock] she wente sone,
And saw his barge sailing in the see.
Cold wex her herte, and right thus seide she.
"Meker than ye finde I the bestes wilde!"
Hadde he nat sinne, that her thus begylde?
She cryed, "O turne again, for routhe and sinne!
Thy barge hath nat al his meiny inne!"
Her kerchef on a pole up stikked she,
Ascaunce that he sholde hit wel y-see,
And him remembre that she was behinde,
And turne again, and on the strand her finde;
But al for noght; his wey he is y-goon [proceed].
And doun she fil a-swown upon a stoon [stone];
And up she rist, and kiste, in al her care,
The steppes of his feet, ther he hath fare,
And to her bedde right thus she speketh tho: --
"Thou bed," quod she, "that hast receyved two,
Thou shalt answere of two, and nat of oon!
Wher is thy gretter part away y-goon [proceed]?
Allas! wher shal I, wrecched wight, become!
For, thogh so be that ship or boot heer come,
home to my contree dar I nat for drede;
I can my-selven in this cas nat rede!"
What shal I telle more her compleining?
Hit is so long, hit were an hevy thing.
In her epistle Naso [Ovid] telleth al;
But shortly to the ende I telle shal.
The goddes have her holpen, for pitee;
And, in the signe of Taurus, men may see
The stones of her coroun shyne clere. --
I wol no more speke of this matere;
But thus this false lover can begyle
His trewe love. The devil quyte him his wyle!





Discover our Poem Explanations and Poet Analyses!


Other Poems of Interest...



Home: PoetryExplorer.net