Classic and Contemporary Poetry
WATER MUSIC, by CHRISTOPHER MURRAY GRIEVE Poet Analysis Poet's Biography First Line: Archin' here and arrachin' there Last Line: Corrieneuchin' a' the nicht. Alternate Author Name(s): Macdiarmid, Hugh | ||||||||
ARCHIN' here and arrachin' there, Allevolie or allemand, Whiles appliable, whiles areird, The polysemous poem's planned. Lively, louch, atweesh, atween, Auchimuty or aspate, Threidin' through the averins Or bightsom in the aftergait. Or barmybrained or barritchfu' Or rinnin' like an attercap, Or shinin' like an Atchison, Wi' a blare or wi' a blawp. They ken a' that opens and steeks, Frae Fiddleton Bar to Callister Ha', And roon aboot for twenty miles They bead and bell and swaw. Brent on or boutgate or beschacht, Bellwaverin' or borne-heid, They mimp and primp, or bick and birr, Dilly-dally or show speed. Brade up or sclafferin', rouchled, sleek, Abstraklous or austerne, In belths below the brae-hags And bebbles in the fern. Bracken, blackberries, and heather Ken their amplefeysts and toves. Here gangs ane wi' aiglets jinglin' Through a gowl anither goves. Lint in the bell whiles hardly vies Wi' ane the wind amows, While blithely doon abradit linns Wi' gowd begane anither jows. Cougher, blocher, boich, and croichle, Fraise in ane anither's witters, Wi' backthraws, births, by-rinnin's, Beggar's broon or blae -- the critters! Or burnet, holine, watchet, chauve, Or wi' a' the colours dyed O' the lift abune and plants and trees That grow on either side. Or coinyelled wi' the midges, Or swallows a' aboot, The shadow o' an eagle, The aiker o' a troot. Toukin' ootrageous face The turn-gree o' your mood I've climmed until I'm lost Like the sun ahint a clood. But a tow-gun frae the boon-tree A whistle frae the elm, A spout-gun frae the hemlock And, back in this auld realm, Dry leafs o' dishielogie To smoke in a "partan's tae". And you've me in your creel again, Brim or shallow, bauch or bricht, Singin' in the mornin', Corrieneuchin' a' the nicht. | Discover our Poem Explanations and Poet Analyses!Other Poems of Interest...THE SKELETON OF THE FUTURE; AT LENIN'S TOMB by CHRISTOPHER MURRAY GRIEVE THE BONNIE BROUKIT BAIRN by CHRISTOPHER MURRAY GRIEVE THE WATERGAW by CHRISTOPHER MURRAY GRIEVE A LITTLE BOY LOST, FR. SONGS OF EXPERIENCE by WILLIAM BLAKE THE FOREFATHER by RICHARD EUGENE BURTON A CRADLE SONG by PADRAIC COLUM UPON HIS DEPARTURE HENCE by ROBERT HERRICK DAFFY-DOWN-DILLY [OR, DAFFYDOWNDILLY] by MOTHER GOOSE |
|