Poetry Explorer- Classic Contemporary Poetry, A MUSIC LESSON, by ALEXANDER HAY JAPP



Poetry Explorer

Classic and Contemporary Poetry

A MUSIC LESSON, by                     Poet's Biography
First Line: Fingers on the holes, johnny
Last Line: But needit a' his skill.
Alternate Author Name(s): Page, H. A.
Subject(s): Music Teachers


FINGERS on the holes, Johnny,
Fairly in a raw:
Lift this and then that,
And blaw, blaw, blaw!
That's hoo to play, Johnny,
On the pipes sae shrill:
Never was the piper yet
But needit a' his skill.

And lang and sair he tried it, tae,
Afore he wan the knack
O' making bag and pipe gie
His verra yearnin's back.
The echo tae his heart-strings
Frae sic a thing to come;
Oh, is it no a wonder --
Like a voice frae out the dumb?

Tak' tentie, noo, my Johnny lad,
Ye maunna hurry thro',
Tak' time and try it ower again --
Sic a blast ye blew!
It's no alane by blawing strang,
But eke by blawing true,
That ye can mak' the music
To thrill folk thro' and thro'.

The waik folk and the learnin',
'T is them that mak's the din;
But for the finish'd pipers
They count it as a sin:
And maybe it's the verra same
A' the warld thro',
The learners are the verra ones
That mak' the most ado!

Ye ken the Southrons taunt us --
I sayna they're unfair --
Aboot oor squallin' music,
And their taunts hae hurt me sair;
But if they 'd heard a piper true
At nicht come ower the hill,
Playin' up a pibroch
Upon the wind sae still:

Risin' noo, and fallin' noo,
And floatin' on the air,
The sounds come saftly on ye
Amaist ere ye're aware,
And wind themsels aboot the heart,
That hasna yet forgot
The witchery o' love and joy
Within some lanely spot:

I'm sure they wadna taunt us sae,
Nor say the bagpipe's wild,
Nor speak o' screachin' noises
Enuch to deave a child:
They would say the bagpipe only
Is the voice of hill and glen;
And would listen to it sorrowing,
Within the haunts of men.

Fingers on the holes, Johnny,
Fairly in a raw:
Lift this and then that,
And blaw, blaw, blaw!
That's hoo to play, Johnny,
On the pipes sae shrill:
Never was the piper yet
But needit a' his skill.





Discover our Poem Explanations and Poet Analyses!


Other Poems of Interest...



Home: PoetryExplorer.net