Poetry Explorer- Classic Contemporary Poetry, HAIRST, by WILLIAM MILLER


Poetry Explorer

Classic and Contemporary Poetry

HAIRST, by                     Poet's Biography
First Line: Tho' weel I lo'e the budding spring, I'll no misca' john frost
Last Line: Wi' saft and winnowing win's to cool the gloaming o' the year.
Alternate Author Name(s): Laureate Of The Nursery
Subject(s): Spring


THO' weel I lo'e the budding spring, I'll no misca' John Frost;
Nor will I roose the simmer days at gowden autumn's cost:
For a' the seasons in their turn, some wish'd-for pleasures bring,
As hand in hand they jink aboot like weans at jingo ring.

Fu' weel I mind how aft ye said, when winter nichts were lang,
"I weary for the simmer woods, the lintie's tittering sang;"
But when the woods grew gay and green, and birds sang sweet and clear,
It then was, "When will hairst-time come, the gloaming o' the year?"

Oh, hairst-time's like a lipping cup that's gi'en wi' furthy glee!
The fields are fu' o' yellow corn, red apples bend the tree;
The genty air, sae ladylike, has on a scented gown,
And wi' an airy string she leads the thistle-seed balloon.

The yellow corn will porridge mak', the apples taste your mou',
And owre the stibble riggs I'll chase the thistle-down wi' you;
I'll put the haw frae aff the thorn, the red hip frae the brier --
For wealth hangs in each tangled nook in the gloaming o' the year.

Sweet hope! ye biggit ha'e a nest within my bairnie's breast --
Oh! may his trusting heart ne'er trow that whiles ye sing in jest;
Some coming joys are dancing aye before his langing een --
He sees the flower that isna blawn, and birds that ne'er were seen; --

The stibble rigg is aye ahin'; the gowden grain afore;
And apples drop into his lap, or row in at the door!
Come, hairst-time, then, unto my bairn, drest in your gayest gear,
Wi' saft and winnowing win's to cool the gloaming o' the year.





Discover our Poem Explanations and Poet Analyses!


Other Poems of Interest...
Home: PoetryExplorer.net