Poetry Explorer- Classic Contemporary Poetry, WEE JOUKYDAIDLES, by JAMES SMITH (1824-)


Poetry Explorer

Classic and Contemporary Poetry

Rhyming Dictionary Search
WEE JOUKYDAIDLES, by            
First Line: Wee joukydaidles, toddlin' oot and in
Last Line: I'll see my bonnie bairnie a braw, braw lass!
Subject(s): Babies; Infants


WEE Joukydaidles, toddlin' oot and in:
Oh, but she's a cuttie, makin' sic a din!
Aye sea fou' o' mischief, an' minds na what I say:
My very heart gangs loup, loup, fifty times a day!

Wee Joukydaidles -- Where's the stumpy noo?
She's tumblin' i' the cruivie, an' lauchin' to the soo!
Noo she sees my angry e'e, an' aff she's like a hare!
Lassie, when I get ye, I'll scud ye till I'm sair!

Wee Joukydaidles -- Noo she's breakin' dishes;
Noo she's soakit i' the burn, catchin' little fishes;
Noo she's i' the barn-yard, playin' wi' the fouls --
Feeding them wi' butter-cakes, snaps, an' sugar-bools.

Wee Joukydaidles -- Oh my heart it's broke!
She's torn my braw new wincey, to mak' a dolly's frock.
There's the goblet owre the fire! the jaud! she weel may rin!
No a tattie ready yet, an' faither comin' in!

Wee Joukydaidles -- Wha's sae tired as me!
See! the kettle's doun at last! waes me for my tea!
Oh, it's angersome, atweel, an' sune'll mak' me grey:
My very heart gangs loup, loup, fifty times a day!

Wee Joukydaidles -- Where's the smoukie noo?
She's hidin' i' the coal-hole, cryin' "Keekybo!"
Noo she's at the fireside, pu'in' pussy's tail --
Noo she's at the broun bowl, suppin' a' the kail!

Wee Joukydaidles -- Paidlin' i' the shower --
There she's at the wundy! haud her, or she's owre!
Noo she's slippit frae my sicht: where's the wean at last?
In the byre amang the kye, sleepin' soun' and fast!

Wee Joukydaidles -- for a' ye gi'e me pain,
Ye're aye my darlin' tottie yet -- my ain wee wean!
An' gin I'm spared to ither days -- Oh may they come to pass! --
I'll see my bonnie bairnie a braw, braw lass!





Other Poems of Interest...
Home: PoetryExplorer.net