Poetry Explorer- Classic Contemporary Poetry, SPRING SONG, by ANONYMOUS



Poetry Explorer

Classic and Contemporary Poetry

SPRING SONG, by                    
First Line: Lenten is come with love to toune
Last Line: "this wunne wele I wol forgon, / ant wight in wode be fleme"
Variant Title(s): Spring Has Come
Subject(s): Spring


LENTEN is come with love to toune,
With blosmen and with briddes roune,
That al this blisse bryngeth,
Dayes-eyes in this dales,
Notes swete of nyghtegales;
Uch foul song singeth.
The threstelcoc him threteth oo;
Away is huere wynter woo,
When woderove springeth.
This foules singeth ferly fele
Ant wlyteth on huere wynter wele,
That al the wode ryngeth.

The rose rayleth hire rode,
The leves on the lyhte wode
Waxen al with wille.
The mone mandeth hire bleo,
The lilie is lossom to seo,
The fenyl ant the fille.
Wowes thise wilde drakes,
Miles murgeth huere makes;
Ase strem that striketh stille,
Mody meneth; so doth mo.
Ichot ycham on of tho
For love that likes ille.

The mone mandeth hire lyht,
So doth the semly sonne bryht,
When briddes singeth breme.
Deawes donketh the dounes,
Deores with huere derne rounes,
Domes forte deme.
Wormes woweth under cloude;
Wymmen waxeth wounder proude,
So wel hit wol hem seme.
Yef me shal wonte wille of on,
This wunne weole I wole forgon,
Ant wyht in wode be fleme.





Discover our Poem Explanations and Poet Analyses!


Other Poems of Interest...



Home: PoetryExplorer.net