Poetry Explorer- Classic Contemporary Poetry, DUNCAN GRAY, by ROBERT BURNS



Poetry Explorer

Classic and Contemporary Poetry

Rhyming Dictionary Search
DUNCAN GRAY, by             Poet's Biography
First Line: Duncan gray cam here to woo
Last Line: Ha, ha! The wooing o't!
Subject(s): Courtship


DUNCAN GRAY cam' here to woo --
Ha, ha! the wooing o't!
On blythe Yule night when we were fou --
Ha, ha! the wooing o't!
Maggie coost her head fu' high,
Looked asklent and unco skeigh,
Gart poor Duncan stand abeigh --
Ha, ha! the wooing o't!
Duncan fleeched and duncan prayed --
Ha, ha! the wooing o't!
Meg was deaf as Ailsa craig --
Ha, ha! the wooing o't!
Duncan sighed baith out and in,
Grat his een baith bleer't and blin',
Spak o' lowpin' o'er a linn --
Ha, ha! the wooing o't!
Time and chance are but a tide --
Ha, ha! the wooing o't!
Slighted love is sair to bide --
Ha, ha! the wooing o't!
Shall I, like a fool, quoth he,
For a haughty hizzie dee?
She may gae to -- France, for me!
Ha, ha! the wooing o't!
How it comes let doctors tell --
Ha, ha! the wooing o't!
Meg grew sick as he grew heal --
Ha, ha! the wooing o't!
Something in her bosom wrings, --
For relief a sigh she brings;
And O, her een they speak sic things!
Ha, ha! the wooing o't!
Duncan was a lad o' grace --
Ha, ha! the wooing o't!
Maggie's was a piteous case --
Ha, ha! the wooing o't!
Duncan could na be her death:
Swelling pity smoored his wrath.
Now they're crouse and canty baith,
Ha, ha! the wooing o't!




Other Poems of Interest...



Home: PoetryExplorer.net