Classic and Contemporary Poetry
COUNTRY LASSIE, by ROBERT BURNS Poet Analysis Poet's Biography First Line: In simmer when the hay was mawn Last Line: "what mair hae queens upon a throne?" Subject(s): Country Life | ||||||||
In simmer when the hay was mawn, And corn wav'd green in ilka field, While claver blooms white o'er the lea And roses blaw in ilka beild! Blythe Bessie in the milking shiel, Says -- "I'll be wed, come o't what will": Out spake a dame in wrinkled eild; "O' gude advisement comes nae ill. "It's ye hae wooers mony ane, And lassie, ye're but young ye ken; Then wait a wee, and cannie wale A routhie butt, a routhie ben; There's Johnie o' the Buskie-glen, Fu' is his barn, fu' is his byre; Take this frae me, my bonnie hen, It's plenty beets the luver's fire." "For Johnie o' the Buskie-glen, I dinna care a single flie; He lo'es sae weel his craps and kye, He has nae love to spare for me; But blythe's the blink o' Robie's e'e, And weel I wat he lo'es me dear: Ae blink o' him I wad na gie For Buskie-glen and a' his gear." "O thoughtless lassie, life's a faught; The canniest gate, the strife is sair; But aye fu'-han't is fechtin' best, A hungry care's an unco care: But some will spend and some will spare, An' wilfu' folk maun hae their will; Syne as ye brew, my maiden fair, Keep mind that ye maun drink the yill." "O gear will buy me rigs o' land, And gear will buy me sheep and kye; But the tender heart o' leesome love, The gowd and siller canna buy; We may be poor -- Robie and I -- Light is the burden love lays on; Content and love brings peace and joy -- What mair hae Queens upon a throne?" | Discover our Poem Explanations and Poet Analyses!Other Poems of Interest...THE TARIFF by GEORGE HENRY BOKER A DRIVE IN THE COUNTRY by TED KOOSER THERE IS ALWAYS A LITTLE WIND by TED KOOSER COUNTRYSIDE by JOSEPHINE MILES A BARD'S EPITAPH by ROBERT BURNS A POET'S WELCOME TO HIS LOVE-BEGOTTEN DAUGHTER by ROBERT BURNS |
|