Poetry Explorer- Classic Contemporary Poetry, GEORDIE'S MARRIAGE, by WILLIAM FINLAYSON


Poetry Explorer

Classic and Contemporary Poetry

GEORDIE'S MARRIAGE, by                    
First Line: O' ken ye that geordie and jean
Last Line: As naebody witness'd their beddin'!
Subject(s): Marriage; Weddings; Husbands; Wives


O, KEN ye that Geordie and Jean
Are cried in the chapel on ither?
And that we are a' to convene
On Friday to loop them thegither?
The lassie is handsome and fair,
Has plenty of beauty and braw things;
And the clatterin' gossips declare,
To furnish a house she has a' things.

Though Geordie has little laid by
To serve the important occasion,
Nane need to gang hungry, or dry,
Gin they ha'e a stout inclination;
His mither, a pensie auld wife,
Has vow'd to preside at the table,
And she can plan things to the life,
An's willing, and hearty, and able.

O' haggises, lang-kail, and pies,
And birsled sheep's-heids there are plenty;
Wi' a patfu' o' guid monie-plies
To taste ony mouth that is dainty.
Then, fiddler, your fiddle-string stent,
And play us up Scamber-cum-scratch-me;
This e'ening on dancing I'm bent,
Gin the bridegroom's guidmother 'ill match me.

Sae, the fiddler he lilted and play'd,
And the young yins I wat werna idle,
While the auld bodies tippled, and pray'd
For a blessing to follow the bridal;
But the main twa deserted the fiel',
And skulkit unseen frae the weddin';
And some think they'll never dae weel,
As naebody witness'd their beddin'!





Discover our Poem Explanations and Poet Analyses!


Other Poems of Interest...
Home: PoetryExplorer.net