Poetry Explorer

Classic and Contemporary Poetry

CONFESSIO AMANTIS: BOOK 5, PART 4, by                 Poet Analysis     Poet's Biography
First Line: Bot whan that sche cast up hire lok
Last Line: With al myn herte I you beseche.


Bot whan that sche cast up hire lok
Toward the stronde and sih no wyht,
Hire herte was so sore aflyht,
That sche ne wiste what to thinke,
Bot drouh hire to the water brinke,
Wher sche behield the See at large.
Sche sih no Schip, sche sih no barge
Als ferforth as sche mihte kenne:
"Ha lord," sche seide, "which a Senne,
As al the world schal after hiere,
Upon this woful womman hiere
This worthi kniht hath don and wroght!
I wende I hadde his love boght,
And so deserved ate nede,
Whan that he stod upon his drede,
And ek the love he me behihte.
It is gret wonder hou he mihte
Towardes me nou ben unkinde,
And so to lete out of his mynde
Thing which he seide his oghne mouth.
Bot after this whan it is couth
And drawe into the worldes fame,
It schal ben hindringe of his name:
For wel he wot and so wot I,
He yaf his trouthe bodily,
That he myn honour scholde kepe."
And with that word sche gan to wepe,
And sorweth more than ynouh:
Hire faire tresces sche todrouh,
And with hirself tok such a strif,
That sche betwen the deth and lif
Swounende lay fulofte among.
And al was this on him along,
Which was to love unkinde so,
Wherof the wrong schal everemo
Stonde in Cronique of remembrance.
And ek it asketh a vengance
To ben unkinde in loves cas,
So as Theses thanne was,
Al thogh he were a noble kniht;
For he the lawe of loves riht
Forfeted hath in alle weie,
That Adriagne he putte aweie,
Which was a gret unkinde dede:
And after this, so as I rede,
Fedra, the which hir Soster is,
He tok in stede of hire, and this
Fel afterward to mochel teene.
For thilke vice of which I meene,
Unkindeschipe, where it falleth,
The trouthe of mannes herte it palleth,
That he can no good dede aquite:
So mai he stonde of no merite
Towardes god, and ek also
Men clepen him the worldes fo;
For he nomore than the fend
Unto non other man is frend,
Bot al toward himself al one.
Forthi, mi Sone, in thi persone
This vice above all othre fle.
Mi fader, as ye techen me,
I thenke don in this matiere.
Bot over this nou wolde I hiere,
Wherof I schal me schryve more.
Mi goode Sone, and for thi lore,
After the reule of coveitise
I schal the proprete devise
Of every vice by and by.
Nou herkne and be wel war therby.
In the lignage of Avarice,
Mi Sone, yit ther is a vice,
His rihte name it is Ravine,
Which hath a route of his covine.
Ravine among the maistres duelleth,
And with his servantz, as men telleth,
Extorcion is nou withholde:
Ravine of othre mennes folde
Makth his larder and paieth noght;
For wher as evere it mai be soght,
In his hous ther schal nothing lacke,
And that fulofte abyth the packe
Of povere men that duelle aboute.
Thus stant the comun poeple in doute,
Which can do non amendement;
For whanne him faileth paiement,
Ravine makth non other skile,
Bot takth be strengthe what he wile.
So ben ther in the same wise
Lovers, as I thee schal devise,
That whan noght elles mai availe,
Anon with strengthe thei assaile
And gete of love the sesine,
Whan thei se time, be Ravine.
Forthi, mi Sone, schrif thee hier,
If thou hast ben a Raviner
Of love. Certes, fader, no:
For I mi ladi love so,
That thogh I were as was Pompeie,
That al the world me wolde obeie,
Or elles such as Alisandre,
I wolde noght do such a sklaundre;
It is no good man, which so doth.
In good feith, Sone, thou seist soth:
For he that wole of pourveance
Be such a weie his lust avance,
He schal it after sore abie,
Bot if these olde ensamples lie.
Nou, goode fader, tell me on,
So as ye cunne manyon,
Touchende of love in this matiere.
Nou list, mi Sone, and thou schalt hiere,
So as it hath befalle er this,
In loves cause hou that it is
A man to take be Ravine
The preie which is femeline.
Ther was a real noble king,
And riche of alle worldes thing,
Which of his propre enheritance
Athenes hadde in governance,
And who so thenke therupon,
His name was king Pandion.
Tuo douhtres hadde he be his wif,
The whiche he lovede as his lif;
The ferste douhter Progne hihte,
And the secounde, as sche wel mihte,
Was cleped faire Philomene,
To whom fell after mochel tene.
The fader of his pourveance
His doughter Progne wolde avance,
And yaf hire unto mariage
A worthi king of hih lignage,
A noble kniht eke of his hond,
So was he kid in every lond,
Of Trace he hihte Teres;
The clerk Ovide telleth thus.
This Teres his wif hom ladde,
A lusti lif with hire he hadde;
Til it befell upon a tyde,
This Progne, as sche lay him besyde,
Bethoughte hir hou it mihte be
That sche hir Soster myhte se,
And to hir lord hir will sche seide,
With goodly wordes and him preide
That sche to hire mihte go:
And if it liked him noght so,
That thanne he wolde himselve wende,
Or elles be som other sende,
Which mihte hire diere Soster griete,
And schape hou that thei mihten miete.
Hir lord anon to that he herde
Yaf his acord, and thus ansuerde:
"I wole," he seide, "for thi sake
The weie after thi Soster take
Miself, and bringe hire, if I may."
And sche with that, there as he lay,
Began him in hire armes clippe,
And kist him with hir softe lippe,
And seide, "Sire, grant mercy."
And he sone after was redy,
And tok his leve forto go;
In sori time dede he so.
This Teres goth forth to Schipe
With him and with his felaschipe;
Be See the rihte cours he nam,
Into the contre til he cam,
Wher Philomene was duellinge,
And of hir Soster the tidinge
He tolde, and tho thei weren glade,
And mochel joie of him thei made.
The fader and the moder bothe
To leve here douhter weren lothe,
Bot if thei weren in presence;
And natheles at reverence
Of him, that wolde himself travaile,
Thei wolden noght he scholde faile
Of that he preide, and yive hire leve:
And sche, that wolde noght beleve,
In alle haste made hire yare
Toward hir Soster forto fare,
With Teres and forth sche wente.
And he with al his hole entente,
Whan sche was fro hir frendes go,
Assoteth of hire love so,
His yhe myhte he noght withholde,
That he ne moste on hir beholde;
And with the sihte he gan desire,
And sette his oghne herte on fyre;
And fyr, whan it to tow aprocheth,
To him anon the strengthe acrocheth,
Til with his hete it be devoured,
The tow ne mai noght be socoured.
And so that tirant raviner,
Whan that sche was in his pouer,
And he therto sawh time and place,
As he that lost hath alle grace,
Foryat he was a wedded man,
And in a rage on hire he ran,
Riht as a wolf which takth his preie.
And sche began to crie and preie,
"O fader, o mi moder diere,
Nou help!" Bot thei ne mihte it hiere,
And sche was of to litel myht
Defense ayein so ruide a knyht
To make, whanne he was so wod
That he no reson understod,
Bot hield hire under in such wise,
That sche ne myhte noght arise,
Bot lay oppressed and desesed,
As if a goshauk hadde sesed
A brid, which dorste noght for fere
Remue: and thus this tirant there
Beraft hire such thing as men sein
Mai neveremor be yolde ayein,
And that was the virginite:
Of such Ravine it was pite.
Bot whan sche to hirselven com,
And of hir meschief hiede nom,
And knew hou that sche was no maide,
With wofull herte thus sche saide,
"O thou of alle men the worste,
Wher was ther evere man that dorste
Do such a dede as thou hast do?
That dai schal falle, I hope so,
That I schal telle out al mi fille,
And with mi speche I schal fulfille
The wyde world in brede and lengthe.
That thou hast do to me be strengthe,
If I among the poeple duelle,
Unto the poeple I schal it telle;
And if I be withinne wall
Of Stones closed, thanne I schal
Unto the Stones clepe and crie,
And tellen hem thi felonie;
And if I to the wodes wende,
Ther schal I tellen tale and ende,
And crie it to the briddes oute,
That thei schul hiere it al aboute.
For I so loude it schal reherce,
That my vois schal the hevene perce,
That it schal soune in goddes Ere.
Ha, false man, where is thi fere?
O mor cruel than eny beste,
Hou hast thou holden thi beheste
Which thou unto my Soster madest?
O thou, which alle love ungladest,
And art ensample of alle untrewe,
Nou wolde god mi Soster knewe,
Of thin untrouthe, hou that it stod!"
And he than as a Lyon wod
With hise unhappi handes stronge
Hire cauhte be the tresses longe,
With whiche he bond ther bothe hire armes,
That was a fieble dede of armes,
And to the grounde anon hire caste,
And out he clippeth also faste
Hire tunge with a peire scheres.
So what with blod and what with teres
Out of hire yhe and of hir mouth,
He made hire faire face uncouth:
Sche lay swounende unto the deth,
Ther was unethes eny breth;
Bot yit whan he hire tunge refte,
A litel part therof belefte,
Bot sche with al no word mai soune,
Bot chitre and as a brid jargoune.
And natheles that wode hound
Hir bodi hent up fro the ground,
And sente hir there as be his wille
Sche scholde abyde in prison stille
For everemo: bot nou tak hiede
What after fell of this misdede.
Whanne al this meschief was befalle,
This Teres, that foule him falle,
Unto his contre hom he tyh;
And whan he com his paleis nyh,
His wif al redi there him kepte.
Whan he hir sih, anon he wepte,
And that he dede for deceite,
For sche began to axe him streite,
"Wher is mi Soster?" And he seide
That sche was ded; and Progne abreide,
As sche that was a wofull wif,
And stod betuen hire deth and lif,
Of that sche herde such tidinge:
Bot for sche sih hire lord wepinge,
She wende noght bot alle trouthe,
And hadde wel the more routhe.
The Perles weren tho forsake
To hire, and blake clothes take;
As sche that was gentil and kinde,
In worschipe of hir Sostres mynde
Sche made a riche enterement,
For sche fond non amendement
To syghen or to sobbe more:
So was ther guile under the gore.
Nou leve we this king and queene,
And torne ayein to Philomene,
As I began to tellen erst.
Whan sche cam into prison ferst,
It thoghte a kinges douhter strange
To maken so soudein a change
Fro welthe unto so grete a wo;
And sche began to thenke tho,
Thogh sche be mouthe nothing preide,
Withinne hir herte thus sche seide:
"O thou, almyhty Jupiter,
That hihe sist and lokest fer,
Thou soffrest many a wrong doinge,
And yit it is noght thi willinge.
To thee ther mai nothing ben hid,
Thou wost hou it is me betid:
I wolde I hadde noght be bore,
For thanne I hadde noght forlore
Mi speche and mi virginite.
Bot, goode lord, al is in thee,
Whan thou therof wolt do vengance
And schape mi deliverance."
And evere among this ladi wepte,
And thoghte that sche nevere kepte
To ben a worldes womman more,
And that sche wissheth everemore.
Bot ofte unto hir Soster diere
Hire herte spekth in this manere,
And seide, "Ha, Soster, if ye knewe
Of myn astat, ye wolde rewe,
I trowe, and my deliverance
Ye wolde schape, and do vengance
On him that is so fals a man:
And natheles, so as I can,
I wol you sende som tokninge,
Wherof ye schul have knowlechinge
Of thing I wot, that schal you lothe,
The which you toucheth and me bothe."
And tho withinne a whyle als tyt
Sche waf a cloth of Selk al whyt
With lettres and ymagerie,
In which was al the felonie,
Which Teres to hire hath do;
And lappede it togedre tho
And sette hir signet therupon
And sende it unto Progne anon.
The messager which forth it bar,
What it amonteth is noght war;
And natheles to Progne he goth
And prively takth hire the cloth,
And wente ayein riht as he cam,
The court of him non hiede nam.
Whan Progne of Philomene herde,
Sche wolde knowe hou that it ferde,
And opneth that the man hath broght,
And wot therby what hath be wroght
And what meschief ther is befalle.
In swoune tho sche gan doun falle,
And efte aros and gan to stonde,
And eft sche takth the cloth on honde,
Behield the lettres and thymages;
Bot ate laste, "Of suche oultrages,"
Sche seith, "wepinge is noght the bote:"
And swerth, if that sche live mote,
It schal be venged otherwise.
And with that sche gan hire avise
Hou ferst sche mihte unto hire winne
Hir Soster, that noman withinne,
Bot only thei that were suore,
It scholde knowe, and schop therfore
That Teres nothing it wiste;
And yit riht as hirselven liste,
Hir Soster was delivered sone
Out of prison, and be the mone
To Progne sche was broght be nyhte.
Whan ech of other hadde a sihte,
In chambre, ther thei were al one,
Thei maden many a pitous mone;
Bot Progne most of sorwe made,
Which sihe hir Soster pale and fade
And specheles and deshonoured,
Of that sche hadde be defloured;
And ek upon hir lord sche thoghte,
Of that he so untreuly wroghte
And hadde his espousaile broke.
Sche makth a vou it schal be wroke,
And with that word sche kneleth doun
Wepinge in gret devocioun:
Unto Cupide and to Venus
Sche preide, and seide thanne thus:
"O ye, to whom nothing asterte
Of love mai, for every herte
Ye knowe, as ye that ben above
The god and the goddesse of love;
Ye witen wel that evere yit
With al mi will and al my wit,
Sith ferst ye schopen me to wedde,
That I lay with mi lord abedde,
I have be trewe in mi degre,
And evere thoghte forto be,
And nevere love in other place,
Bot al only the king of Trace,
Which is mi lord and I his wif.
Bot nou allas this wofull strif!
That I him thus ayeinward finde
The most untrewe and most unkinde
That evere in ladi armes lay.
And wel I wot that he ne may
Amende his wrong, it is so gret;
For he to lytel of me let,
Whan he myn oughne Soster tok,
And me that am his wif forsok."
Lo, thus to Venus and Cupide
Sche preide, and furthermor sche cride
Unto Appollo the hiheste,
And seide, "O myghti god of reste,
Thou do vengance of this debat.
Mi Soster and al hire astat
Thou wost, and hou sche hath forlore
Hir maidenhod, and I therfore
In al the world schal bere a blame
Of that mi Soster hath a schame,
That Teres to hire I sente:
And wel thou wost that myn entente
Was al for worschipe and for goode.
O lord, that yifst the lives fode
To every wyht, I prei thee hiere
Thes wofull Sostres that ben hiere,
And let ous noght to the ben lothe;
We ben thin oghne wommen bothe."
Thus pleigneth Progne and axeth wreche,
And thogh hire Soster lacke speche,
To him that alle thinges wot
Hire sorwe is noght the lasse hot:
Bot he that thanne had herd hem tuo,
Him oughte have sorwed everemo
For sorwe which was hem betuene.
With signes pleigneth Philomene,
And Progne seith, "It schal be wreke,
That al the world therof schal speke."
And Progne tho seknesse feigneth,
Wherof unto hir lord sche pleigneth,
And preith sche moste hire chambres kepe,
And as hir liketh wake and slepe.
And he hire granteth to be so;
And thus togedre ben thei tuo,
That wolde him bot a litel good.
Nou herk hierafter hou it stod
Of wofull auntres that befelle:
Thes Sostres, that ben bothe felle,-
And that was noght on hem along,
Bot onliche on the grete wrong
Which Teres hem hadde do,-
Thei schopen forto venge hem tho.
This Teres be Progne his wif
A Sone hath, which as his lif
He loveth, and Ithis he hihte:
His moder wiste wel sche mihte
Do Teres no more grief
Than sle this child, which was so lief.
Thus sche, that was, as who seith, mad
Of wo, which hath hir overlad,
Withoute insihte of moderhede
Foryat pite and loste drede,
And in hir chambre prively
This child withouten noise or cry
Sche slou, and hieu him al to pieces:
And after with diverse spieces
The fleissh, whan it was so toheewe,
Sche takth, and makth therof a sewe,
With which the fader at his mete
Was served, til he hadde him ete;
That he ne wiste hou that it stod,
Bot thus his oughne fleissh and blod
Himself devoureth ayein kinde,
As he that was tofore unkinde.
And thanne, er that he were arise,
For that he scholde ben agrise,
To schewen him the child was ded,
This Philomene tok the hed
Betwen tuo disshes, and al wrothe
Tho comen forth the Sostres bothe,
And setten it upon the bord.
And Progne tho began the word,
And seide, "O werste of alle wicke,
Of conscience whom no pricke
Mai stere, lo, what thou hast do!
Lo, hier ben nou we Sostres tuo;
O Raviner, lo hier thi preie,
With whom so falsliche on the weie
Thou hast thi tirannye wroght.
Lo, nou it is somdel aboght,
And bet it schal, for of thi dede
The world schal evere singe and rede
In remembrance of thi defame:
For thou to love hast do such schame,
That it schal nevere be foryete."
With that he sterte up fro the mete,
And schof the bord unto the flor,
And cauhte a swerd anon and suor
That thei scholde of his handes dye.
And thei unto the goddes crie
Begunne with so loude a stevene,
That thei were herd unto the hevene;
And in a twinclinge of an yhe
The goddes, that the meschief syhe,
Here formes changen alle thre.
Echon of hem in his degre
Was torned into briddes kinde;
Diverseliche, as men mai finde,
After thastat that thei were inne,
Here formes were set atwinne.
And as it telleth in the tale,
The ferst into a nyhtingale
Was schape, and that was Philomene,
Which in the wynter is noght sene,
For thanne ben the leves falle
And naked ben the buisshes alle.
For after that sche was a brid,
Hir will was evere to ben hid,
And forto duelle in prive place,
That noman scholde sen hir face
For schame, which mai noght be lassed,
Of thing that was tofore passed,
Whan that sche loste hir maidenhiede:
For evere upon hir wommanhiede,
Thogh that the goddes wolde hire change,
Sche thenkth, and is the more strange,
And halt hir clos the wyntres day.
Bot whan the wynter goth away,
And that Nature the goddesse
Wole of hir oughne fre largesse
With herbes and with floures bothe
The feldes and the medwes clothe,
And ek the wodes and the greves
Ben heled al with grene leves,
So that a brid hire hyde mai,
Betwen Averil and March and Maii,
Sche that the wynter hield hir clos,
For pure schame and noght aros,
Whan that sche seth the bowes thikke,
And that ther is no bare sticke,
Bot al is hid with leves grene,
To wode comth this Philomene
And makth hir ferste yeres flyht;
Wher as sche singeth day and nyht,
And in hir song al openly
Sche makth hir pleignte and seith, "O why,
O why ne were I yit a maide?"
For so these olde wise saide,
Which understoden what sche mente,
Hire notes ben of such entente.
And ek thei seide hou in hir song
Sche makth gret joie and merthe among,
And seith, "Ha, nou I am a brid,
Ha, nou mi face mai ben hid:
Thogh I have lost mi Maidenhede,
Schal noman se my chekes rede."
Thus medleth sche with joie wo
And with hir sorwe merthe also,
So that of loves maladie
Sche makth diverse melodie,
And seith love is a wofull blisse,
A wisdom which can noman wisse,
A lusti fievere, a wounde softe:
This note sche reherceth ofte
To hem whiche understonde hir tale.
Nou have I of this nyhtingale,
Which erst was cleped Philomene,
Told al that evere I wolde mene,
Bothe of hir forme and of hir note,
Wherof men mai the storie note.
And of hir Soster Progne I finde,
Hou sche was torned out of kinde
Into a Swalwe swift of winge,
Which ek in wynter lith swounynge,
Ther as sche mai nothing be sene:
Bot whan the world is woxe grene
And comen is the Somertide,
Than fleth sche forth and ginth to chide,
And chitreth out in hir langage
What falshod is in mariage,
And telleth in a maner speche
Of Teres the Spousebreche.
Sche wol noght in the wodes duelle,
For sche wolde openliche telle;
And ek for that sche was a spouse,
Among the folk sche comth to house,
To do thes wyves understonde
The falshod of hire housebonde,
That thei of hem be war also,
For ther ben manye untrewe of tho.
Thus ben the Sostres briddes bothe,
And ben toward the men so lothe,
That thei ne wole of pure schame
Unto no mannes hand be tame;
For evere it duelleth in here mynde
Of that thei founde a man unkinde,
And that was false Teres.
If such on be amonges ous
I not, bot his condicion
Men sein in every region
Withinne toune and ek withoute
Nou regneth comunliche aboute.
And natheles in remembrance
I wol declare what vengance
The goddes hadden him ordeined,
Of that the Sostres hadden pleigned:
For anon after he was changed
And from his oghne kinde stranged,
A lappewincke mad he was,
And thus he hoppeth on the gras,
And on his hed ther stant upriht
A creste in tokne he was a kniht;
And yit unto this dai men seith,
A lappewincke hath lore his feith
And is the brid falseste of alle.
Bewar, mi Sone, er thee so falle;
For if thou be of such covine,
To gete of love be Ravine
Thi lust, it mai thee falle thus,
As it befell of Teres.
Mi fader, goddes forebode!
Me were levere be fortrode
With wilde hors and be todrawe,
Er I ayein love and his lawe
Dede eny thing or loude or stille,
Which were noght mi ladi wille.
Men sein that every love hath drede;
So folweth it that I hire drede,
For I hire love, and who so dredeth,
To plese his love and serve him nedeth.
Thus mai ye knowen be this skile
That no Ravine don I wile
Ayein hir will be such a weie;
Bot while I live, I wol obeie
Abidinge on hire courtesie,
If eny merci wolde hir plie.
Forthi, mi fader, as of this
I wot noght I have don amis:
Bot furthermore I you beseche,
Som other point that ye me teche,
And axeth forth, if ther be auht,
That I mai be the betre tauht.
Whan Covoitise in povere astat
Stant with himself upon debat
Thurgh lacke of his misgovernance,
That he unto his sustienance
Ne can non other weie finde
To gete him good, thanne as the blinde,
Which seth noght what schal after falle,
That ilke vice which men calle
Of Robberie, he takth on honde;
Wherof be water and be londe
Of thing which othre men beswinke
He get him cloth and mete and drinke.
Him reccheth noght what he beginne,
Thurgh thefte so that he mai winne:
Forthi to maken his pourchas
He lith awaitende on the pas,
And what thing that he seth ther passe,
He takth his part, or more or lasse,
If it be worthi to be take.
He can the packes wel ransake,
So prively berth non aboute
His gold, that he ne fint it oute,
Or other juel, what it be;
He takth it as his proprete.
In wodes and in feldes eke
Thus Robberie goth to seke,
Wher as he mai his pourpos finde.
And riht so in the same kinde,
My goode Sone, as thou miht hiere,
To speke of love in the matiere
And make a verrai resemblance,
Riht as a thief makth his chevance
And robbeth mennes good aboute
In wode and field, wher he goth oute,
So be ther of these lovers some,
In wylde stedes wher thei come
And finden there a womman able,
And therto place covenable,
Withoute leve, er that thei fare,
Thei take a part of that chaffare:
Yee, though sche were a Scheperdesse,
Yit wol the lord of wantounesse
Assaie, althogh sche be unmete,
For other mennes good is swete.
Bot therof wot nothing the wif
At hom, which loveth as hir lif
Hir lord, and sitt alday wisshinge
After hir lordes hom comynge:
Bot whan that he comth hom at eve,
Anon he makth his wif beleve,
For sche noght elles scholde knowe:
He telth hire hou his hunte hath blowe,
And hou his houndes have wel runne,
And hou ther schon a merye Sunne,
And hou his haukes flowen wel;
Bot he wol telle her nevere a diel
Hou he to love untrewe was,
Of that he robbede in the pas,
And tok his lust under the schawe
Ayein love and ayein his lawe.
Which thing, mi Sone, I thee forbede,
For it is an ungoodly dede.
For who that takth be Robberie
His love, he mai noght justefie
His cause, and so fulofte sithe
For ones that he hath be blithe
He schal ben after sory thries.
Ensample of suche Robberies
I finde write, as thou schalt hiere,
Acordende unto this matiere.
I rede hou whilom was a Maide,
The faireste, as Ovide saide,
Which was in hire time tho;
And sche was of the chambre also
Of Pallas, which is the goddesse
And wif to Marte, of whom prouesse
Is yove to these worthi knihtes.
For he is of so grete mihtes,
That he governeth the bataille;
Withouten him may noght availe
The stronge hond, bot he it helpe;
Ther mai no knyht of armes yelpe,
Bot he feihte under his banere.
Bot nou to speke of mi matiere,
This faire, freisshe, lusti mai,
Al one as sche wente on a dai
Upon the stronde forto pleie,
Ther cam Neptunus in the weie,
Which hath the See in governance;
And in his herte such plesance
He tok, whan he this Maide sih,
That al his herte aros on hih,
For he so sodeinliche unwar
Behield the beaute that sche bar.
And caste anon withinne his herte
That sche him schal no weie asterte,
Bot if he take in avantage
Fro thilke maide som pilage,
Noght of the broches ne the Ringes,
Bot of some othre smale thinges
He thoghte parte, er that sche wente;
And hire in bothe hise armes hente,
And putte his hond toward the cofre,
Wher forto robbe he made a profre,
That lusti tresor forto stele,
Which passeth othre goodes fele
And cleped is the maidenhede,
Which is the flour of wommanhede.
This Maiden, which Cornix be name
Was hote, dredende alle schame,
Sih that sche mihte noght debate,
And wel sche wiste he wolde algate
Fulfille his lust of Robberie,
Anon began to wepe and crie,
And seide, "O Pallas, noble queene,
Scheu nou thi myht and let be sene,
To kepe and save myn honour:
Help, that I lese noght mi flour,
Which nou under thi keie is loke."
That word was noght so sone spoke,
Whan Pallas schop recoverir
After the will and the desir
Of hire, which a Maiden was,
And sodeinliche upon this cas
Out of hire wommanisshe kinde
Into a briddes like I finde
Sche was transformed forth withal,
So that Neptunus nothing stal
Of such thing as he wolde have stole.
With fetheres blake as eny cole
Out of hise armes in a throwe
Sche flih before his yhe a Crowe;
Which was to hire a more delit,
To kepe hire maidenhede whit
Under the wede of fethers blake,
In Perles whyte than forsake
That no lif mai restore ayein.
Bot thus Neptune his herte in vein
Hath upon Robberie sett;
The bridd is flowe and he was let,
The faire Maide him hath ascaped,
Wherof for evere he was bejaped
And scorned of that he hath lore.
Mi Sone, be thou war therfore
That thou no maidenhode stele,
Wherof men sen deseses fele
Aldai befalle in sondri wise;
So as I schal thee yit devise
An other tale therupon,
Which fell be olde daies gon.
King Lichaon upon his wif
A dowhter hadde, a goodly lif,
A clene Maide of worthi fame,
Calistona whos rihte name
Was cleped, and of many a lord
Sche was besoght, bot hire acord
To love myhte noman winne,
As sche which hath no lust therinne;
Bot swor withinne hir herte and saide
That sche wolde evere ben a Maide.
Wherof to kepe hireself in pes,
With suche as Amadriades
Were cleped, wodemaydes, tho,
And with the Nimphes ek also
Upon the spring of freisshe welles
Sche schop to duelle and nagher elles.
And thus cam this Calistona
Into the wode of Tegea,
Wher sche virginite behihte
Unto Diane, and therto plihte
Her trouthe upon the bowes grene,
To kepe hir maidenhode clene.
Which afterward upon a day
Was priveliche stole away;
For Jupiter thurgh his queintise
From hire it tok in such a wise,
That sodeinliche forth withal
Hire wombe aros and sche toswal,
So that it mihte noght ben hidd.
And therupon it is betidd,
Diane, which it herde telle,
In prive place unto a welle
With Nimphes al a compainie
Was come, and in a ragerie
Sche seide that sche bathe wolde,
And bad that every maide scholde
With hire al naked bathe also.
And tho began the prive wo,
Calistona wax red for schame;
Bot thei that knewe noght the game,
To whom no such thing was befalle,
Anon thei made hem naked alle,
As thei that nothing wolden hyde:
Bot sche withdrouh hire evere asyde,
And natheles into the flod,
Wher that Diane hirselve stod,
Sche thoghte come unaperceived.
Bot therof sche was al deceived;
For whan sche cam a litel nyh,
And that Diane hire wombe syh,
Sche seide, "Awey, thou foule beste,
For thin astat is noght honeste
This chaste water forto touche;
For thou hast take such a touche,
Which nevere mai ben hol ayein."
And thus goth sche which was forlein
With schame, and fro the Nimphes fledde,
Til whanne that nature hire spedde,
That of a Sone, which Archas
Was named, sche delivered was.
And tho Juno, which was the wif
Of Jupiter, wroth and hastif,
In pourpos forto do vengance
Cam forth upon this ilke chance,
And to Calistona sche spak,
And sette upon hir many a lak,
And seide, "Ha, nou thou art atake,
That thou thi werk myht noght forsake.
Ha, thou ungoodlich ypocrite,
Hou thou art gretly forto wyte!
Bot nou thou schalt ful sore abie
That ilke stelthe and micherie,
Which thou hast bothe take and do;
Wherof thi fader Lichao
Schal noght be glad, whan he it wot,
Of that his dowhter was so hot,
That sche hath broke hire chaste avou.
Bot I thee schal chastise nou;
Thi grete beaute schal be torned,
Thurgh which that thou hast be mistorned,
Thi large frount, thin yhen greie,
I schal hem change in other weie,
And al the feture of thi face
In such a wise I schal deface,
That every man thee schal forbere."
With that the liknesse of a bere
Sche tok and was forschape anon.
Withinne a time and therupon
Befell that with a bowe on honde,
To hunte and gamen forto fonde,
Into that wode goth to pleie
Hir Sone Archas, and in his weie
It hapneth that this bere cam.
And whan that sche good hiede nam,
Wher that he stod under the bowh,
Sche kneu him wel and to him drouh;
For thogh sche hadde hire forme lore,
The love was noght lost therfore
Which kinde hath set under his lawe.
Whan sche under the wodesschawe
Hire child behield, sche was so glad,
That sche with bothe hire armes sprad,
As thogh sche were in wommanhiede,
Toward him cam, and tok non hiede
Of that he bar a bowe bent.
And he with that an Arwe hath hent
And gan to teise it in his bowe,
As he that can non other knowe,
Bot that it was a beste wylde.
Bot Jupiter, which wolde schylde
The Moder and the Sone also,
Ordeineth for hem bothe so,
That thei for evere were save.
Bot thus, mi Sone, thou myht have
Ensample, hou that it is to fle
To robbe the virginite
Of a yong innocent aweie:
And overthis be other weie,
In olde bokes as I rede,
Such Robberie is forto drede,
And nameliche of thilke good
Which every womman that is good
Desireth forto kepe and holde,
As whilom was be daies olde.
For if thou se mi tale wel
Of that was tho, thou miht somdiel
Of old ensample taken hiede,
Hou that the flour of maidenhiede
Was thilke time holde in pris.
And so it was, and so it is,
And so it schal for evere stonde:
And for thou schalt it understonde,
Nou herkne a tale next suiende,
Hou maidenhod is to commende.
Of Rome among the gestes olde
I finde hou that Valerie tolde
That what man tho was Emperour
Of Rome, he scholde don honour
To the virgine, and in the weie,
Wher he hire mette, he scholde obeie
In worschipe of virginite,
Which tho was of gret dignite.
Noght onliche of the wommen tho,
Bot of the chaste men also
It was commended overal:
And forto speke in special
Touchende of men, ensample I finde,
Phyryns, which was of mannes kinde
Above alle othre the faireste
Of Rome and ek the comelieste,
That wel was hire which him mihte
Beholde and have of him a sihte.
Thus was he tempted ofte sore;
Bot for he wolde be nomore
Among the wommen so coveited,
The beaute of his face streited
He hath, and threste out bothe hise yhen,
That alle wommen whiche him syhen
Thanne afterward, of him ne roghte:
And thus his maidehiede he boghte.
So mai I prove wel forthi,
Above alle othre under the Sky,
Who that the vertus wolde peise,
Virginite is forto preise,
Which, as thapocalips recordeth,
To Crist in hevene best acordeth.
So mai it schewe wel therfore,
As I have told it hier tofore,
In hevene and ek in Erthe also
It is accept to bothe tuo.
And if I schal more over this
Declare what this vertu is,
I finde write upon this thing
Of Valentinian the king
And Emperour be thilke daies,
A worthi knyht at alle assaies,
Hou he withoute Mariage
Was of an hundred wynter Age,
And hadde ben a worthi kniht
Bothe of his lawe and of his myht.
Bot whan men wolde his dedes peise
And his knyhthode of Armes preise,
Of that he dede with his hondes,
Whan he the kinges and the londes
To his subjeccion put under,
Of al that pris hath he no wonder,
For he it sette of non acompte,
And seide al that may noght amonte
Ayeins o point which he hath nome,
That he his fleissh hath overcome:
He was a virgine, as he seide;
On that bataille his pris he leide.
Lo nou, my Sone, avise thee.
Yee, fader, al this wel mai be,
Bot if alle othre dede so,
The world of men were sone go:
And in the lawe a man mai finde,
Hou god to man be weie of kinde
Hath set the world to multeplie;
And who that wol him justefie,
It is ynouh to do the lawe.
And natheles youre goode sawe
Is good to kepe, who so may,
I wol noght therayein seie nay.
Mi Sone, take it as I seie;
If maidenhod be take aweie
Withoute lawes ordinance,
It mai noght failen of vengance.
And if thou wolt the sothe wite,
Behold a tale which is write,
Hou that the King Agamenon,
Whan he the Cite of Lesbon
Hath wonne, a Maiden ther he fond,
Which was the faireste of the Lond
In thilke time that men wiste.
He tok of hire what him liste
Of thing which was most precious,
Wherof that sche was dangerous.
This faire Maiden cleped is
Criseide, douhter of Crisis,
Which was that time in special
Of thilke temple principal,
Wher Phebus hadde his sacrifice,
So was it wel the more vice.
Agamenon was thanne in weie
To Troieward, and tok aweie
This Maiden, which he with him ladde,
So grete a lust in hire he hadde.
Bot Phebus, which hath gret desdeign
Of that his Maiden was forlein,
Anon as he to Troie cam,
Vengance upon this dede he nam
And sende a comun pestilence.
Thei soghten thanne here evidence
And maden calculacion,
To knowe in what condicion
This deth cam in so sodeinly;
And ate laste redyly
The cause and ek the man thei founde:
And forth withal the same stounde
Agamenon opposed was,
Which hath beknowen al the cas
Of the folie which he wroghte.
And therupon mercy thei soghte
Toward the god in sondri wise
With preiere and with sacrifise,
The Maide and hom ayein thei sende,
And yive hire good ynouh to spende
For evere whil sche scholde live:
And thus the Senne was foryive
And al the pestilence cessed.
Lo, what it is to ben encressed
Of love which is evele wonne.
It were betre noght begonne
Than take a thing withoute leve,
Which thou most after nedes leve,
And yit have malgre forth withal.
Forthi to robben overal
In loves cause if thou beginne,
I not what ese thou schalt winne.
Mi Sone, be wel war of this,
For thus of Robberie it is.
Mi fader, youre ensamplerie
In loves cause of Robberie
I have it riht wel understonde.
Bot overthis, hou so it stonde,
Yit wolde I wite of youre aprise
What thing is more of Covoitise.
With Covoitise yit I finde
A Servant of the same kinde,
Which Stelthe is hote, and Mecherie
With him is evere in compainie.
Of whom if I schal telle soth,
He stalketh as a Pocok doth,
And takth his preie so covert,
That noman wot it in apert.
For whan he wot the lord from home,
Than wol he stalke aboute and rome;
And what thing he fint in his weie,
Whan that he seth the men aweie,
He stelth it and goth forth withal,
That therof noman knowe schal.
And ek fulofte he goth a nyht
Withoute Mone or sterreliht,
And with his craft the dore unpiketh,
And takth therinne what him liketh:
And if the dore be so schet,
That he be of his entre let,
He wole in ate wyndou crepe,
And whil the lord is faste aslepe,
He stelth what thing as him best list,
And goth his weie er it be wist.
Fulofte also be lyhte of day
Yit wole he stele and make assay;
Under the cote his hond he put,
Til he the mannes Purs have cut,
And rifleth that he fint therinne.
And thus he auntreth him to winne,
And berth an horn and noght ne bloweth,
For noman of his conseil knoweth;
What he mai gete of his Michinge,
It is al bile under the winge.
And as an hound that goth to folde
And hath ther taken what he wolde,
His mouth upon the gras he wypeth,
And so with feigned chiere him slypeth,
That what as evere of schep he strangle,
Ther is noman therof schal jangle,
As forto knowen who it dede;
Riht so doth Stelthe in every stede,
Where as him list his preie take.
He can so wel his cause make
And so wel feigne and so wel glose,
That ther ne schal noman suppose,
Bot that he were an innocent,
And thus a mannes yhe he blent:
So that this craft I mai remene
Withouten help of eny mene.
Ther be lovers of that degre,
Which al here lust in privete,
As who seith, geten al be Stelthe,
And ofte atteignen to gret welthe
As for the time that it lasteth.
For love awaiteth evere and casteth
Hou he mai stele and cacche his preie,
Whan he therto mai finde a weie:
For be it nyht or be it day,
He takth his part, whan that he may,
And if he mai nomore do,
Yit wol he stele a cuss or tuo.
Mi Sone, what seist thou therto?
Tell if thou dedest evere so.
Mi fader, hou? Mi Sone, thus,-
If thou hast stolen eny cuss
Or other thing which therto longeth,
For noman suche thieves hongeth:
Tell on forthi and sei the trouthe.
Mi fader, nay, and that is routhe,
For be mi will I am a thief;
Bot sche that is to me most lief,
Yit dorste I nevere in privete
Noght ones take hire be the kne,
To stele of hire or this or that,
And if I dorste, I wot wel what:
And natheles, bot if I lie,
Be Stelthe ne be Robberie
Of love, which fell in mi thoght,
To hire dede I nevere noght.
Bot as men sein, wher herte is failed,
Ther schal no castell ben assailed;
Bot thogh I hadde hertes ten,
And were als strong as alle men,
If I be noght myn oghne man
And dar noght usen that I can,
I mai miselve noght recovere.
Thogh I be nevere man so povere,
I bere an herte and hire it is,
So that me faileth wit in this,
Hou that I scholde of myn acord
The servant lede ayein the lord:
For if mi fot wolde awher go,
Or that min hand wolde elles do,
Whan that myn herte is therayein,
The remenant is al in vein.
And thus me lacketh alle wele,
And yit ne dar I nothing stele
Of thing which longeth unto love:
And ek it is so hyh above,
I mai noght wel therto areche,
Bot if so be at time of speche,
Ful selde if thanne I stele may
A word or tuo and go my way.
Betwen hire hih astat and me
Comparison ther mai non be,
So that I fiele and wel I wot,
Al is to hevy and to hot
To sette on hond withoute leve:
And thus I mot algate leve
To stele that I mai noght take,
And in this wise I mot forsake
To ben a thief ayein mi wille
Of thing which I mai noght fulfille.
For that Serpent which nevere slepte
The flees of gold so wel ne kepte
In Colchos, as the tale is told,
That mi ladi a thousendfold
Nys betre yemed and bewaked,
Wher sche be clothed or be naked.
To kepe hir bodi nyht and day,
Sche hath a wardein redi ay,
Which is so wonderful a wyht,
That him ne mai no mannes myht
With swerd ne with no wepne daunte,
Ne with no sleihte of charme enchaunte,
Wherof he mihte be mad tame,
And Danger is his rihte name;
Which under lock and under keie,
That noman mai it stele aweie,
Hath al the Tresor underfonge
That unto love mai belonge.
The leste lokinge of hire yhe
Mai noght be stole, if he it syhe;
And who so gruccheth for so lyte,
He wolde sone sette a wyte
On him that wolde stele more.
And that me grieveth wonder sore,
For this proverbe is evere newe,
That stronge lokes maken trewe
Of hem that wolden stele and pyke:
For so wel can ther noman slyke
Be him ne be non other mene,
To whom Danger wol yive or lene
Of that tresor he hath to kepe.
So thogh I wolde stalke and crepe,
And wayte on eve and ek on morwe,
Of Danger schal I nothing borwe,
And stele I wot wel may I noght:
And thus I am riht wel bethoght,
Whil Danger stant in his office,
Of Stelthe, which ye clepe a vice,
I schal be gultif neveremo.
Therfore I wolde he were ago
So fer that I nevere of him herde,
Hou so that afterward it ferde:
For thanne I mihte yit per cas
Of love make som pourchas
Be Stelthe or be som other weie,
That nou fro me stant fer aweie.
Bot, fader, as ye tolde above,
Hou Stelthe goth a nyht for love,
I mai noght wel that point forsake,
That ofte times I ne wake
On nyhtes, whan that othre slepe;
Bot hou, I prei you taketh kepe.
Whan I am loged in such wise
That I be nyhte mai arise,
At som wyndowe and loken oute
And se the housinge al aboute,
So that I mai the chambre knowe
In which mi ladi, as I trowe,
Lyth in hir bed and slepeth softe,
Thanne is myn herte a thief fulofte:
For there I stonde to beholde
The longe nyhtes that ben colde,
And thenke on hire that lyth there.
And thanne I wisshe that I were
Als wys as was Nectanabus
Or elles as was Prothes,
That couthen bothe of nigromaunce
In what liknesse, in what semblaunce,
Riht as hem liste, hemself transforme:
For if I were of such a forme,
I seie thanne I wolde fle
Into the chambre forto se
If eny grace wolde falle,
So that I mihte under the palle
Som thing of love pyke and stele.
And thus I thenke thoghtes fele,
And thogh therof nothing be soth,
Yit ese as for a time it doth:
Bot ate laste whanne I finde
That I am falle into my mynde,
And se that I have stonde longe
And have no profit underfonge,
Than stalke I to mi bedd withinne.
And this is al that evere I winne
Of love, whanne I walke on nyht:
Mi will is good, bot of mi myht
Me lacketh bothe and of mi grace;
For what so that mi thoght embrace,
Yit have I noght the betre ferd.
Mi fader, lo, nou have ye herd
What I be Stelthe of love have do,
And hou mi will hath be therto:
If I be worthi to penance
I put it on your ordinance.
Mi Sone, of Stelthe I the behiete,
Thogh it be for a time swete,
At ende it doth bot litel good,
As be ensample hou that it stod
Whilom, I mai thee telle nou.
I preie you, fader, sei me hou.
Mi Sone, of him which goth be daie
Be weie of Stelthe to assaie,
In loves cause and takth his preie,
Ovide seide as I schal seie,
And in his Methamor he tolde
A tale, which is good to holde.
The Poete upon this matiere
Of Stelthe wrot in this manere.
Venus, which hath this lawe in honde
Of thing which mai noght be withstonde,
As sche which the tresor to warde
Of love hath withinne hir warde,
Phebum to love hath so constreigned,
That he withoute reste is peined
With al his herte to coveite
A Maiden, which was warded streyte
Withinne chambre and kept so clos,
That selden was whan sche desclos
Goth with hir moder forto pleie.
Leuchotoe, so as men seie,
This Maiden hihte, and Orchamus
Hir fader was; and befell thus.
This doughter, that was kept so deere,
And hadde be fro yer to yeere
Under hir moder discipline
A clene Maide and a Virgine,
Upon the whos nativite
Of comelihiede and of beaute
Nature hath set al that sche may,
That lich unto the fresshe Maii,
Which othre monthes of the yeer
Surmonteth, so withoute pier
Was of this Maiden the feture.
Wherof Phebus out of mesure
Hire loveth, and on every syde
Awaiteth, if so mai betyde,
That he thurgh eny sleihte myhte
Hire lusti maidenhod unrihte,
The which were al his worldes welthe.
And thus lurkende upon his stelthe
In his await so longe he lai,
Til it befell upon a dai,
That he thurghout hir chambre wall
Cam in al sodeinliche, and stall
That thing which was to him so lief.
Bot wo the while, he was a thief!
For Venus, which was enemie
Of thilke loves micherie,
Discovereth al the pleine cas
To Clymene, which thanne was
Toward Phebus his concubine.
And sche to lette the covine
Of thilke love, dedli wroth
To pleigne upon this Maide goth,
And tolde hire fader hou it stod;
Wherof for sorwe welnyh wod
Unto hire moder thus he saide:
"Lo, what it is to kepe a Maide!
To Phebus dar I nothing speke,
Bot upon hire I schal be wreke,
So that these Maidens after this
Mow take ensample, what it is
To soffre her maidenhed be stole,
Wherof that sche the deth schal thole."
And bad with that do make a pet,
Wherinne he hath his douhter set,
As he that wol no pite have,
So that sche was al quik begrave
And deide anon in his presence.
Bot Phebus, for the reverence
Of that sche hadde be his love,
Hath wroght thurgh his pouer above,
That sche sprong up out of the molde
Into a flour was named golde,
Which stant governed of the Sonne.
And thus whan love is evele wonne,
Fulofte it comth to repentaile.
Mi fader, that is no mervaile,
Whan that the conseil is bewreid.
Bot ofte time love hath pleid
And stole many a prive game,
Which nevere yit cam into blame,
Whan that the thinges weren hidde.
Bot in youre tale, as it betidde,
Venus discoverede al the cas,
And ek also brod dai it was,
Whan Phebus such a Stelthe wroghte,
Wherof the Maide in blame he broghte,
That afterward sche was so lore.
Bot for ye seiden nou tofore
Hou stelthe of love goth be nyhte,
And doth hise thinges out of syhte,
Therof me liste also to hiere
A tale lich to the matiere,
Wherof I myhte ensample take.
Mi goode Sone, and for thi sake,
So as it fell be daies olde,
And so as the Poete it tolde,
Upon the nyhtes micherie
Nou herkne a tale of Poesie.
The myhtieste of alle men
Whan Hercules with Eolen,
Which was the love of his corage,
Togedre upon a Pelrinage
Towardes Rome scholden go,
It fell hem be the weie so,
That thei upon a dai a Cave
Withinne a roche founden have,
Which was real and glorious
And of Entaile curious,
Be name and Thophis it was hote.
The Sonne schon tho wonder hote,
As it was in the Somer tyde;
This Hercules, which be his syde
Hath Eolen his love there,
Whan thei at thilke cave were,
He seide it thoghte him for the beste
That sche hire for the hete reste
Al thilke day and thilke nyht;
And sche, that was a lusti wyht,
It liketh hire al that he seide:
And thus thei duelle there and pleide
The longe dai. And so befell,
This Cave was under the hell
Of Tymolus, which was begrowe
With vines, and at thilke throwe
Faunus with Saba the goddesse,
Be whom the large wildernesse
In thilke time stod governed,
Weere in a place, as I am lerned,
Nyh by, which Bachus wode hihte.
This Faunus tok a gret insihte
Of Eolen, that was so nyh;
For whan that he hire beaute syh,
Out of his wit he was assoted,
And in his herte it hath so noted,
That he forsok the Nimphes alle,
And seide he wolde, hou so it falle,
Assaie an other forto winne;
So that his hertes thoght withinne
He sette and caste hou that he myhte
Of love pyke awey be nyhte
That he be daie in other wise
To stele mihte noght suffise:
And therupon his time he waiteth.
Nou tak good hiede hou love afaiteth
Him which withal is overcome.
Faire Eolen, whan sche was come
With Hercules into the Cave,
Sche seide him that sche wolde have
Hise clothes of and hires bothe,
That ech of hem scholde other clothe.
And al was do riht as sche bad,
He hath hire in hise clothes clad
And caste on hire his gulion,
Which of the Skyn of a Leoun
Was mad, as he upon the weie
It slouh, and overthis to pleie
Sche tok his grete Mace also
And knet it at hir gerdil tho.
So was sche lich the man arraied,
And Hercules thanne hath assaied
To clothen him in hire array:
And thus thei jape forth the dai,
Til that her Souper redy were.
And whan thei hadden souped there,
Thei schopen hem to gon to reste;
And as it thoghte hem for the beste,
Thei bede, as for that ilke nyht,
Tuo sondri beddes to be dyht,
For thei togedre ligge nolde,
Be cause that thei offre wolde
Upon the morwe here sacrifice.
The servantz deden here office
And sondri beddes made anon,
Wherin that thei to reste gon
Ech be himself in sondri place.
Faire Eole hath set the Mace
Beside hire beddes hed above,
And with the clothes of hire love
Sche helede al hire bed aboute;
And he, which hadde of nothing doute,
Hire wympel wond aboute his cheke,
Hire kertell and hire mantel eke
Abrod upon his bed he spredde.
And thus thei slepen bothe abedde;
And what of travail, what of wyn,
The servantz lich to drunke Swyn
Begunne forto route faste.
This Faunus, which his Stelthe caste,
Was thanne come to the Cave,
And fond thei weren alle save
Withoute noise, and in he wente.
The derke nyht his sihte blente,
And yit it happeth him to go
Where Eolen abedde tho
Was leid al one for to slepe;
Bot for he wolde take kepe
Whos bed it was, he made assai,
And of the Leoun, where it lay,
The Cote he fond, and ek he fieleth
The Mace, and thanne his herte kieleth,
That there dorste he noght abyde,
Bot stalketh upon every side
And soghte aboute with his hond,
That other bedd til that he fond,
Wher lai bewympled a visage.
Tho was he glad in his corage,
For he hir kertell fond also
And ek hir mantell bothe tuo
Bespred upon the bed alofte.
He made him naked thanne, and softe
Into the bedd unwar he crepte,
Wher Hercules that time slepte,
And wende wel it were sche;
And thus in stede of Eole
Anon he profreth him to love.
But he, which felte a man above,
This Hercules, him threw to grounde
So sore, that thei have him founde
Liggende there upon the morwe;
And tho was noght a litel sorwe,
That Faunus of himselve made,
Bot elles thei were alle glade
And lowhen him to scorne aboute:
Saba with Nimphis al a route
Cam doun to loke hou that he ferde,
And whan that thei the sothe herde,
He was bejaped overal.
Mi Sone, be thou war withal
To seche suche mecheries,
Bot if thou have the betre aspies,
In aunter if the so betyde
As Faunus dede thilke tyde,
Wherof thou miht be schamed so.
Min holi fader, certes no.
Bot if I hadde riht good leve,
Such mecherie I thenke leve:
Mi feinte herte wol noght serve;
For malgre wolde I noght deserve
In thilke place wher I love.
Bot for ye tolden hier above
Of Covoitise and his pilage,
If ther be more of that lignage,
Which toucheth to mi schrifte, I preie
That ye therof me wolde seie,
So that I mai the vice eschuie.
Mi Sone, if I be order suie
The vices, as thei stonde arowe,
Of Covoitise thou schalt knowe
Ther is yit on, which is the laste;
In whom ther mai no vertu laste,
For he with god himself debateth,
Wherof that al the hevene him hateth.
The hihe god, which alle goode
Pourveied hath for mannes fode
Of clothes and of mete and drinke,
Bad Adam that he scholde swinke
To geten him his sustienance:
And ek he sette an ordinance
Upon the lawe of Moi5ses,
That though a man be haveles,
Yit schal he noght be thefte stele.
Bot nou adaies ther ben fele,
That wol no labour undertake,
Bot what thei mai be Stelthe take
Thei holde it sikerliche wonne.
And thus the lawe is overronne,
Which god hath set, and namely
With hem that so untrewely
The goodes robbe of holi cherche.
The thefte which thei thanne werche
Be name is cleped Sacrilegge,
Ayein the whom I thenke alegge.
Of his condicion to telle,
Which rifleth bothe bok and belle,
So forth with al the remenant
To goddes hous appourtenant,
Wher that he scholde bidde his bede,
He doth his thefte in holi stede,
And takth what thing he fint therinne:
For whan he seth that he mai winne,
He wondeth for no cursednesse,
That he ne brekth the holinesse
And doth to god no reverence;
For he hath lost his conscience,
That though the Prest therfore curse,
He seith he fareth noght the wurse.
And forto speke it otherwise,
What man that lasseth the franchise
And takth of holi cherche his preie,
I not what bedes he schal preie.
Whan he fro god, which hath yive al,
The Pourpartie in special,
Which unto Crist himself is due,
Benymth, he mai noght wel eschue
The peine comende afterward;
For he hath mad his foreward
With Sacrilegge forto duelle,
Which hath his heritage in helle.
And if we rede of tholde lawe,
I finde write, in thilke dawe
Of Princes hou ther weren thre
Coupable sore in this degre.
That on of hem was cleped thus,
The proude king Antiochus;
That other Nabuzardan hihte,
Which of his crualte behyhte
The temple to destruie and waste,
And so he dede in alle haste;
The thridde, which was after schamed,
Was Nabugodonosor named,
And he Jerusalem putte under,
Of Sacrilegge and many a wonder
There in the holi temple he wroghte,
Which Baltazar his heir aboghte,
Whan Mane, Techel, Phares write
Was on the wal, as thou miht wite,
So as the bible it hath declared.
Bot for al that it is noght spared
Yit nou aday, that men ne pile,
And maken argument and skile
To Sacrilegge as it belongeth,
For what man that ther after longeth,
He takth non hiede what he doth.
And riht so, forto telle soth,
In loves cause if I schal trete,
Ther ben of suche smale and grete:
If thei no leisir fynden elles,
Thei wol noght wonden for the belles,
Ne thogh thei sen the Prest at masse;
That wol thei leten overpasse.
If that thei finde here love there,
Thei stonde and tellen in hire Ere,
And axe of god non other grace,
Whyl thei ben in that holi place;
Bot er thei gon som avantage
Ther wol thei have, and som pilage
Of goodli word or of beheste,
Or elles thei take ate leste
Out of hir hand or ring or glove,
So nyh the weder thei wol love,
As who seith sche schal noght foryete,
Nou I this tokne of hire have gete:
Thus halwe thei the hihe feste.
Such thefte mai no cherche areste,
For al is leveful that hem liketh,
To whom that elles it misliketh.
And ek riht in the selve kinde
In grete Cites men mai finde
This lusti folk, that make it gay,
And waite upon the haliday:
In cherches and in Menstres eke
Thei gon the wommen forto seke,
And wher that such on goth aboute,
Tofore the faireste of the route,
Wher as thei sitten alle arewe,
Ther wol he most his bodi schewe,
His croket kembd and theron set
A Nouche with a chapelet,
Or elles on of grene leves,
Which late com out of the greves,
Al for he scholde seme freissh.
And thus he loketh on the fleissh,
Riht as an hauk which hath a sihte
Upon the foul, ther he schal lihte;
And as he were of faierie,
He scheweth him tofore here yhe
In holi place wher thei sitte,
Al forto make here hertes flitte.
His yhe nawher wole abyde,
Bot loke and prie on every syde
On hire and hire, as him best lyketh:
And otherwhile among he syketh;
Thenkth on of hem, "That was for me,"
And so ther thenken tuo or thre,
And yit he loveth non of alle,
Bot wher as evere his chance falle.
And natheles to seie a soth,
The cause why that he so doth
Is forto stele an herte or tuo,
Out of the cherche er that he go:
And as I seide it hier above,
Al is that Sacrilege of love;
For wel mai be he stelth away
That he nevere after yelde may.
Tell me forthi, my Sone, anon,
Hast thou do Sacrilege, or non,
As I have said in this manere?
Mi fader, as of this matiere
I wole you tellen redely
What I have do; bot trewely
I mai excuse min entente,
That nevere I yit to cherche wente
In such manere as ye me schryve,
For no womman that is on lyve.
The cause why I have it laft
Mai be for I unto that craft
Am nothing able so to stele,
Thogh ther be wommen noght so fele.
Bot yit wol I noght seie this,
Whan I am ther mi ladi is,
In whom lith holly mi querele,
And sche to cherche or to chapele
Wol go to matins or to messe,-
That time I waite wel and gesse,
To cherche I come and there I stonde,
And thogh I take a bok on honde,
Mi contienance is on the bok,
Bot toward hire is al my lok;
And if so falle that I preie
Unto mi god, and somwhat seie
Of Paternoster or of Crede,
Al is for that I wolde spede,
So that mi bede in holi cherche
Ther mihte som miracle werche
Mi ladi herte forto chaunge,
Which evere hath be to me so strange.
So that al mi devocion
And al mi contemplacion
With al min herte and mi corage
Is only set on hire ymage;
And evere I waite upon the tyde.
If sche loke eny thing asyde,
That I me mai of hire avise,
Anon I am with covoitise
So smite, that me were lief
To ben in holi cherche a thief;
Bot noght to stele a vestement,
For that is nothing mi talent,
Bot I wold stele, if that I mihte,
A glad word or a goodly syhte;
And evere mi service I profre,
And namly whan sche wol gon offre,
For thanne I lede hire, if I may,
For somwhat wolde I stele away.
Whan I beclippe hire on the wast,
Yit ate leste I stele a tast,
And otherwhile "grant mercy"
Sche seith, and so winne I therby
A lusti touch, a good word eke,
Bot al the remenant to seke
Is fro mi pourpos wonder ferr.
So mai I seie, as I seide er,
In holy cherche if that I wowe,
My conscience it wolde allowe,
Be so that up amendement
I mihte gete assignement
Wher forto spede in other place:
Such Sacrilege I holde a grace.
And thus, mi fader, soth to seie,
In cherche riht as in the weie,
If I mihte oght of love take,
Such hansell have I noght forsake.
Bot finali I me confesse,
Ther is in me non holinesse,
Whil I hire se in eny stede;
And yit, for oght that evere I dede,
No Sacrilege of hire I tok,
Bot if it were of word or lok,
Or elles if that I hir fredde,
Whan I toward offringe hir ledde,
Take therof what I take may,
For elles bere I noght away:
For thogh I wolde oght elles have,
Alle othre thinges ben so save
And kept with such a privilege,
That I mai do no Sacrilege.
God wot mi wille natheles,
Thogh I mot nedes kepe pes
And malgre myn so let it passe,
Mi will therto is noght the lasse,
If I mihte other wise aweie.
Forthi, mi fader, I you preie,
Tell what you thenketh therupon,
If I therof have gult or non.
Thi will, mi Sone, is forto blame,
The remenant is bot a game,
That I have herd the telle as yit.
Bot tak this lore into thi wit,
That alle thing hath time and stede,
The cherche serveth for the bede,
The chambre is of an other speche.
Bot if thou wistest of the wreche,
Hou Sacrilege it hath aboght,
Thou woldest betre ben bethoght;
And for thou schalt the more amende,
A tale I wole on the despende.
To alle men, as who seith, knowe
It is, and in the world thurgh blowe,
Hou that of Troie Lamedon
To Hercules and to Jasoun,
Whan toward Colchos out of Grece
Be See sailende upon a piece
Of lond of Troie reste preide,-
Bot he hem wrathfulli congeide:
And for thei founde him so vilein,
Whan thei come into Grece ayein,
With pouer that thei gete myhte
Towardes Troie thei hem dyhte,
And ther thei token such vengance,
Wherof stant yit the remembrance;
For thei destruide king and al,
And leften bot the brente wal.
The Grecs of Troiens many slowe
And prisoners thei toke ynowe,
Among the whiche ther was on,
The kinges doughter Lamedon,
Esiona, that faire thing,
Which unto Thelamon the king
Be Hercules and be thassent
Of al the hole parlement
Was at his wille yove and granted.
And thus hath Grece Troie danted,
And hom thei torne in such manere:
Bot after this nou schalt thou hiere
The cause why this tale I telle,
Upon the chances that befelle.
King Lamedon, which deide thus,
He hadde a Sone, on Priamus,
Which was noght thilke time at hom:
Bot whan he herde of this, he com,
And fond hou the Cite was falle,
Which he began anon to walle
And made ther a cite newe,
That thei whiche othre londes knewe
Tho seiden, that of lym and Ston
In al the world so fair was non.
And on that o side of the toun
The king let maken Ylioun,
That hihe Tour, that stronge place,
Which was adrad of no manace
Of quarel nor of non engin;
And thogh men wolde make a Myn,
No mannes craft it mihte aproche,
For it was sett upon a roche.
The walles of the toun aboute,
Hem stod of al the world no doute,
And after the proporcion
Sex gates weren of the toun
Of such a forme, of such entaile,
That hem to se was gret mervaile:
The diches weren brode and depe,
A fewe men it mihte kepe
From al the world, as semeth tho,
Bot if the goddes weren fo.
Gret presse unto that cite drouh,
So that ther was of poeple ynouh,
Of Burgeis that therinne duellen;
Ther mai no mannes tunge tellen
Hou that cite was riche of good.
Whan al was mad and al wel stod,
King Priamus tho him bethoghte
What thei of Grece whilom wroghte,
And what was of her swerd devoured,
And hou his Soster deshonoured
With Thelamon awey was lad:
And so thenkende he wax unglad,
And sette anon a parlement,
To which the lordes were assent.
In many a wise ther was spoke,
Hou that thei mihten ben awroke,
Bot ate laste natheles
Thei seiden alle, "Acord and pes."
To setten either part in reste
It thoghte hem thanne for the beste
With resonable amendement;
And thus was Anthenor forth sent
To axe Esionam ayein
And witen what thei wolden sein.
So passeth he the See be barge
To Grece forto seie his charge,
The which he seide redely
Unto the lordes by and by:
Bot where he spak in Grece aboute,
He herde noght bot wordes stoute,
And nameliche of Thelamon;
The maiden wolde he noght forgon,
He seide, for no maner thing,
And bad him gon hom to his king,
For there gat he non amende
For oght he couthe do or sende.
This Anthenor ayein goth hom
Unto his king, and whan he com,
He tolde in Grece of that he herde,
And hou that Thelamon ansuerde,
And hou thei were at here above,
That thei wol nouther pes ne love,
Bot every man schal don his beste.
Bot for men sein that nyht hath reste,
The king bethoghte him al that nyht,
And erli, whan the dai was lyht,
He tok conseil of this matiere;
And thei acorde in this manere,
That he withouten eny lette
A certein time scholde sette
Of Parlement to ben avised:
And in the wise it was devised,
Of parlement he sette a day,
And that was in the Monthe of Maii.
This Priamus hadde in his yhte
A wif, and Hecuba sche hyhte,
Be whom that time ek hadde he
Of Sones fyve, and douhtres thre
Besiden hem, and thritty mo,
And weren knyhtes alle tho,
Bot noght upon his wif begete,
Bot elles where he myhte hem gete
Of wommen whiche he hadde knowe;
Such was the world at thilke throwe:
So that he was of children riche,
As therof was noman his liche.
Of Parlement the dai was come,
Ther ben the lordes alle and some;
Tho was pronounced and pourposed,
And al the cause hem was desclosed,
Hou Anthenor in Grece ferde.
Thei seten alle stille and herde,
And tho spak every man aboute:
Ther was alegged many a doute,
And many a proud word spoke also;
Bot for the moste part as tho
Thei wisten noght what was the beste,
Or forto werre or forto reste.
Bot he that was withoute fere,
Hector, among the lordes there
His tale tolde in such a wise,
And seide, "Lordes, ye ben wise,
Ye knowen this als wel as I,
Above all othre most worthi
Stant nou in Grece the manhode
Of worthinesse and of knihthode;
For who so wole it wel agrope,
To hem belongeth al Europe,
Which is the thridde parti evene
Of al the world under the hevene;
And we be bot of folk a fewe.
So were it reson forto schewe
The peril, er we falle thrinne:
Betre is to leve, than beginne
Thing which as mai noght ben achieved;
He is noght wys that fint him grieved,
And doth so that his grief be more;
For who that loketh al tofore
And wol noght se what is behinde,
He mai fulofte hise harmes finde:
Wicke is to stryve and have the worse.
We have encheson forto corse,
This wot I wel, and forto hate
The Greks; bot er that we debate
With hem that ben of such a myht,
It is ful good that every wiht
Be of himself riht wel bethoght.
Bot as for me this seie I noght;
For while that mi lif wol stonde,
If that ye taken werre on honde,
Falle it to beste or to the werste,
I schal miselven be the ferste
To grieven hem, what evere I may.
I wol noght ones seie nay
To thing which that youre conseil demeth,
For unto me wel more it quemeth
The werre certes than the pes;
Bot this I seie natheles,
As me belongeth forto seie.
Nou schape ye the beste weie."
Whan Hector hath seid his avis,
Next after him tho spak Paris,
Which was his brother, and alleide
What him best thoghte, and thus he seide:
"Strong thing it is to soffre wrong,
And suffre schame is more strong,
Bot we have suffred bothe tuo;
And for al that yit have we do
What so we mihte to reforme
The pes, whan we in such a forme
Sente Anthenor, as ye wel knowe.
And thei here grete wordes blowe
Upon her wrongful dedes eke;
And who that wole himself noght meke
To pes, and list no reson take,
Men sein reson him wol forsake:
For in the multitude of men
Is noght the strengthe, for with ten
It hath be sen in trew querele
Ayein an hundred false dele,
And had the betre of goddes grace.
This hath befalle in many place;
And if it like unto you alle,
I wolde assaie, hou so it falle,
Oure enemis if I mai grieve;
For I have cawht a gret believe
Upon a point I wol declare.
This ender day, as I gan fare
To hunte unto the grete hert,
Which was tofore myn houndes stert,
And every man went on his syde
Him to poursuie, and I to ryde
Began the chace, and soth to seie,
Withinne a while out of mi weie
I rod, and nyste where I was.
And slep me cauhte, and on the gras
Beside a welle I lay me doun
To slepe, and in a visioun
To me the god Mercurie cam;
Goddesses thre with him he nam,
Minerve, Venus and Juno,
And in his hond an Appel tho
He hield of gold with lettres write:
And this he dede me to wite,
Hou that thei putt hem upon me,
That to the faireste of hem thre
Of gold that Appel scholde I yive.
With ech of hem tho was I schrive,
And echon faire me behihte;
Bot Venus seide, if that sche mihte
That Appel of mi yifte gete,
Sche wolde it neveremor foryete,
And seide hou that in Grece lond
Sche wolde bringe unto myn hond
Of al this Erthe the faireste;
So that me thoghte it for the beste,
To hire and yaf that Appel tho.
Thus hope I wel, if that I go,
That sche for me wol so ordeine,
That thei matiere forto pleigne
Schul have, er that I come ayein.
Nou have ye herd that I wol sein:
Sey ye what stant in youre avis."
And every man tho seide his,
And sundri causes thei recorde,
Bot ate laste thei acorde
That Paris schal to Grece wende,
And thus the parlement tok ende.
Cassandra, whan sche herde of this,
The which to Paris Soster is,
Anon sche gan to wepe and weile,
And seide, "Allas, what mai ous eile?
Fortune with hire blinde whiel
Ne wol noght lete ous stonde wel:
For this I dar wel undertake,
That if Paris his weie take,
As it is seid that he schal do,
We ben for evere thanne undo."
This, which Cassandre thanne hihte,
In al the world as it berth sihte,
In bokes as men finde write,
Is that Sibille of whom ye wite,
That alle men yit clepen sage.
Whan that sche wiste of this viage,
Hou Paris schal to Grece fare,
No womman mihte worse fare
Ne sorwe more than sche dede;
And riht so in the same stede
Ferde Helenus, which was hir brother,
Of prophecie and such an other:
And al was holde bot a jape,
So that the pourpos which was schape,
Or were hem lief or were hem loth,
Was holde, and into Grece goth
This Paris with his retenance.
And as it fell upon his chance,
Of Grece he londeth in an yle,
And him was told the same whyle
Of folk which he began to freyne,
Tho was in thyle queene Heleyne,
And ek of contres there aboute
Of ladis many a lusti route,
With mochel worthi poeple also.
And why thei comen theder tho,
The cause stod in such a wise,-
For worschipe and for sacrifise
That thei to Venus wolden make,
As thei tofore hadde undertake,
Some of good will, some of beheste,
For thanne was hire hihe feste
Withinne a temple which was there.
Whan Paris wiste what thei were,
Anon he schop his ordinance
To gon and don his obeissance
To Venus on hire holi day,
And dede upon his beste aray.
With gret richesse he him behongeth,
As it to such a lord belongeth,
He was noght armed natheles,
Bot as it were in lond of pes,
And thus he goth forth out of Schipe
And takth with him his felaschipe:
In such manere as I you seie
Unto the temple he hield his weie.
Tydinge, which goth overal
To grete and smale, forth withal
Com to the queenes Ere and tolde
Hou Paris com, and that he wolde
Do sacrifise to Venus:
And whan sche herde telle thus,
Sche thoghte, hou that it evere be,
That sche wole him abyde and se.
Forth comth Paris with glad visage
Into the temple on pelrinage,
Wher unto Venus the goddesse
He yifth and offreth gret richesse,
And preith hir that he preie wolde.
And thanne aside he gan beholde,
And sih wher that this ladi stod;
And he forth in his freisshe mod
Goth ther sche was and made her chiere,
As he wel couthe in his manere,
That of his wordes such plesance
Sche tok, that al hire aqueintance,
Als ferforth as the herte lay,
He stal er that he wente away.
So goth he forth and tok his leve,
And thoghte, anon as it was eve,
He wolde don his Sacrilegge,
That many a man it scholde abegge.
Whan he to Schipe ayein was come,
To him he hath his conseil nome,
And al devised the matiere
In such a wise as thou schalt hiere.
Withinne nyht al prively
His men he warneth by and by,
That thei be redy armed sone
For certein thing which was to done:
And thei anon ben redi alle,
And ech on other gan to calle,
And went hem out upon the stronde
And tok a pourpos ther alonde
Of what thing that thei wolden do,
Toward the temple and forth thei go.
So fell it, of devocion
Heleine in contemplacion
With many an other worthi wiht
Was in the temple and wok al nyht,
To bidde and preie unto thymage
Of Venus, as was thanne usage;
So that Paris riht as him liste
Into the temple, er thei it wiste,
Com with his men al sodeinly,
And alle at ones sette ascry
In hem whiche in the temple were,
For tho was mochel poeple there;
Bot of defense was no bote,
So soffren thei that soffre mote.
Paris unto the queene wente,
And hire in bothe hise armes hente
With him and with his felaschipe,
And forth thei bere hire unto Schipe.
Up goth the Seil and forth thei wente,
And such a wynd fortune hem sente,
Til thei the havene of Troie cauhte;
Where out of Schipe anon thei strauhte
And gon hem forth toward the toun,
The which cam with processioun
Ayein Paris to sen his preie.
And every man began to seie
To Paris and his felaschipe
Al that thei couthen of worschipe;
Was non so litel man in Troie,
That he ne made merthe and joie
Of that Paris hath wonne Heleine.
Bot al that merthe is sorwe and peine
To Helenus and to Cassaundre;
For thei it token schame and sklaundre
And lost of al the comun grace,
That Paris out of holi place
Be Stelthe hath take a mannes wif,
Wherof that he schal lese his lif
And many a worthi man therto,
And al the Cite be fordo,
Which nevere schal be mad ayein.
And so it fell, riht as thei sein,
The Sacrilege which he wroghte
Was cause why the Gregois soughte
Unto the toun and it beleie,
And wolden nevere parte aweie,
Til what be sleihte and what be strengthe
Thei hadde it wonne in brede and lengthe,
And brent and slayn that was withinne.
Now se, mi Sone, which a sinne
Is Sacrilege in holy stede:
Be war therfore and bidd thi bede,
And do nothing in holy cherche,
Bot that thou miht be reson werche.
And ek tak hiede of Achilles,
Whan he unto his love ches
Polixena, that was also
In holi temple of Appollo,
Which was the cause why he dyde
And al his lust was leyd asyde.
And Troilus upon Criseide
Also his ferste love leide
In holi place, and hou it ferde,
As who seith, al the world it herde;
Forsake he was for Diomede,
Such was of love his laste mede.
Forthi, mi Sone, I wolde rede,
Be this ensample as thou myht rede,
Sech elles, wher thou wolt, thi grace,
And war the wel in holi place
What thou to love do or speke,
In aunter if it so be wreke
As thou hast herd me told before.
And tak good hiede also therfore
Upon what forme, of Avarice
Mor than of eny other vice,
I have divided in parties
The branches, whiche of compainies
Thurghout the world in general
Ben nou the leders overal,
Of Covoitise and of Perjure,
Of fals brocage and of Usure,
Of Skarsnesse and Unkindeschipe,
Which nevere drouh to felaschipe,
Of Robberie and privi Stelthe,
Which don is for the worldes welthe,
Of Ravine and of Sacrilegge,
Which makth the conscience agregge;
Althogh it mai richesse atteigne,
It floureth, bot it schal noght greine
Unto the fruit of rihtwisnesse.
Bot who that wolde do largesse
Upon the reule as it is yive,
So myhte a man in trouthe live
Toward his god, and ek also
Toward the world, for bothe tuo
Largesse awaiteth as belongeth,
To neither part that he ne wrongeth;
He kepth himself, he kepth his frendes,
So stant he sauf to bothe hise endes,
That he excedeth no mesure,
So wel he can himself mesure:
Wherof, mi Sone, thou schalt wite,
So as the Philosophre hath write.
Betwen the tuo extremites
Of vice stant the propretes
Of vertu, and to prove it so
Tak Avarice and tak also
The vice of Prodegalite;
Betwen hem Liberalite,
Which is the vertu of Largesse,
Stant and governeth his noblesse.
For tho tuo vices in discord
Stonde evere, as I finde of record;
So that betwen here tuo debat
Largesse reuleth his astat.
For in such wise as Avarice,
As I tofore have told the vice,
Thurgh streit holdinge and thurgh skarsnesse
Stant in contraire to Largesse,
Riht so stant Prodegalite
Revers, bot noght in such degre.
For so as Avarice spareth,
And forto kepe his tresor careth,
That other al his oghne and more
Ayein the wise mannes lore
Yifth and despendeth hiere and there,
So that him reccheth nevere where.
While he mai borwe, he wol despende,
Til ate laste he seith, "I wende";
Bot that is spoken al to late,
For thanne is poverte ate gate
And takth him evene be the slieve,
For erst wol he no wisdom lieve.
And riht as Avarice is Sinne,
That wolde his tresor kepe and winne,
Riht so is Prodegalite:
Bot of Largesse in his degre,
Which evene stant betwen the tuo,
The hihe god and man also
The vertu ech of hem commendeth.
For he himselven ferst amendeth,
That overal his name spredeth,
And to alle othre, where it nedeth,
He yifth his good in such a wise,
That he makth many a man arise,
Which elles scholde falle lowe.
Largesce mai noght ben unknowe;
For what lond that he regneth inne,
It mai noght faile forto winne
Thurgh his decerte love and grace,
Wher it schal faile in other place.
And thus betwen tomoche and lyte
Largesce, which is noght to wyte,
Halt evere forth the middel weie:
Bot who that torne wole aweie
Fro that to Prodegalite,
Anon he lest the proprete
Of vertu and goth to the vice;
For in such wise as Avarice
Lest for scarsnesse his goode name,
Riht so that other is to blame,
Which thurgh his wast mesure excedeth,
For noman wot what harm that bredeth.
Bot mochel joie ther betydeth,
Wher that largesse an herte guydeth:
For his mesure is so governed,
That he to bothe partz is lerned,
To god and to the world also,
He doth reson to bothe tuo.
The povere folk of his almesse
Relieved ben in the destresse
Of thurst, of hunger and of cold;
The yifte of him was nevere sold,
Bot frely yive, and natheles
The myhti god of his encress
Rewardeth him of double grace;
The hevene he doth him to pourchace
And yifth him ek the worldes good:
And thus the Cote for the hod
Largesse takth, and yit no Sinne
He doth, hou so that evere he winne.
What man hath hors men yive him hors,
And who non hath of him no fors,
For he mai thanne on fote go;
The world hath evere stonde so.
Bot forto loken of the tweie,
A man to go the siker weie,
Betre is to yive than to take:
With yifte a man mai frendes make,
Bot who that takth or gret or smal,
He takth a charge forth withal,
And stant noght fre til it be quit.
So forto deme in mannes wit,
It helpeth more a man to have
His oghne good, than forto crave
Of othre men and make him bounde,
Wher elles he mai stonde unbounde.
Senec conseileth in this wise,
And seith, "Bot, if thi good suffise
Unto the liking of thi wille,
Withdrawh thi lust and hold the stille,
And be to thi good sufficant."
For that thing is appourtenant
To trouthe and causeth to be fre
After the reule of charite,
Which ferst beginneth of himselve.
For if thou richest othre tuelve,
Wherof thou schalt thiself be povere,
I not what thonk thou miht recovere.
Whil that a man hath good to yive,
With grete routes he mai live
And hath his frendes overal,
And everich of him telle schal.
Therwhile he hath his fulle packe,
Thei seie, "A good felawe is Jacke";
Bot whanne it faileth ate laste,
Anon his pris thei overcaste,
For thanne is ther non other lawe
Bot, "Jacke was a good felawe."
Whan thei him povere and nedy se,
Thei lete him passe and farwel he;
Al that he wende of compainie
Is thanne torned to folie.
Bot nou to speke in other kinde
Of love, a man mai suche finde,
That wher thei come in every route
Thei caste and waste her love aboute,
Til al here time is overgon,
And thanne have thei love non:
For who that loveth overal,
It is no reson that he schal
Of love have eny proprete.
Forthi, mi Sone, avise thee
If thou of love hast be to large,
For such a man is noght to charge:
And if it so be that thou hast
Despended al thi time in wast
And set thi love in sondri place,
Though thou the substance of thi grace
Lese ate laste, it is no wonder;
For he that put himselven under,
As who seith, comun overal,
He lest the love special
Of eny on, if sche be wys;
For love schal noght bere his pris
Be reson, whanne it passeth on.
So have I sen ful many on,
That were of love wel at ese,
Whiche after felle in gret desese
Thurgh wast of love, that thei spente
In sondri places wher thei wente.
Riht so, mi Sone, I axe of thee
If thou with Prodegalite
Hast hier and ther thi love wasted.
Mi fader, nay; bot I have tasted
In many a place as I have go,
And yit love I nevere on of tho,
Bot forto drive forth the dai.
For lieveth wel, myn herte is ay
Withoute mo for everemore
Al upon on, for I nomore
Desire bot hire love al one:
So make I many a prive mone,
For wel I fiele I have despended
Mi longe love and noght amended
Mi sped, for oght I finde yit.
If this be wast to youre wit
Of love, and Prodegalite,
Nou, goode fader, demeth ye:
Bot of o thing I wol me schryve,
That I schal for no love thryve,
Bot if hirself me wol relieve.
Mi Sone, that I mai wel lieve:
And natheles me semeth so,
For oght that thou hast yit misdo
Of time which thou hast despended,
It mai with grace ben amended.
For thing which mai be worth the cost
Per chaunce is nouther wast ne lost;
For what thing stant on aventure,
That can no worldes creature
Telle in certein hou it schal wende,
Til he therof mai sen an ende.
So that I not as yit therfore
If thou, mi Sone, hast wonne or lore:
For ofte time, as it is sene,
Whan Somer hath lost al his grene
And is with Wynter wast and bare,
That him is left nothing to spare,
Al is recovered in a throwe;
The colde wyndes overblowe,
And still be the scharpe schoures,
And soudeinliche ayein his floures
The Somer hapneth and is riche:
And so per cas thi graces liche,
Mi Sone, thogh thou be nou povere
Of love, yit thou miht recovere.
Mi fader, certes grant merci:
Ye have me tawht so redeli,
That evere whil I live schal
The betre I mai be war withal
Of thing which ye have seid er this.
Bot overmore hou that it is,
Toward mi schrifte as it belongeth,
To wite of othre pointz me longeth;
Wherof that ye me wolden teche
With al myn herte I you beseche.








Discover our Poem Explanations and Poet Analyses!


Other Poems of Interest...
Home: PoetryExplorer.net