Poetry Explorer- Classic Contemporary Poetry, THE TWA GOWANS, by JESSIE D. M. MORTON


Poetry Explorer

Classic and Contemporary Poetry

THE TWA GOWANS, by                    
First Line: Twa wee gowans bloom'd on a gowanie lea
Last Line: An' the bonnie wee floorie sune wither'd awa.
Subject(s): Flowers


TWA wee gowans bloom'd on a gowanie lea,
Whaur a'things were bonnie as bonnie could be;
The ane had a tinge o' the red heather-bell,
An' the ither was white as the snawdrap itsel'.

The white ane was genty -- was winsom' an' wee,
The red ane was braw as a gowan could be;
An' couthie they grew frae they sprang to the licht,
When their hearties were young an' their headies were licht.

An' aye when the wind wad blaw gurlie an' dour,
The red ane aye bent owre the genty bit flow'r;
When drappies o' rain on its breastie wad fa',
It tenderly lootit an' kiss'd them awa'.

When aft-pitten breezes a daffin' wud fa',
An' a' the braw floories wad touzle an' blaw,
The wee gowans joukit an' jinkit ajee,
They boo'd an' they beck'd, an' waffled wi' glee.

But, ah! whan the red ane was ta'en frae the lea,
The wee ane lay doon on its divot to dee;
It lay in its beauty sae heedless o' a',
Like a wee drap o' gowd on a wee flake o' snaw.

For a' roun' the roots o' the floorie sae kind,
The white ane's wee threedies had lang been entwin'd;
Their hearties were ane, an' they wadna be twa,
An' the bonnie wee floorie sune wither'd awa.





Discover our Poem Explanations and Poet Analyses!


Other Poems of Interest...
Home: PoetryExplorer.net