Poetry Explorer- Classic Contemporary Poetry, SHY GEORDIE, by HELEN B. CRUICKSHANK

Poetry Explorer

Classic and Contemporary Poetry

SHY GEORDIE, by            
First Line: Up the noran water
Last Line: The lucky lad was me!

UP the Noran Water
In by Inglismaddy,
Annie's got a bairnie
That hasna got a daddy.
Some say it's Tammas's,
An' some say it's Chay's;
An' naebody expec'it it,
Wi' Annie's quiet ways.

Up the Noran Water
The bonny little mannie
Is dandled an' cuddled close
By Inglismaddy's Annie.
Wha the bairnie's daddy is
The lassie never says;
But some think it's Tammas's,
An' some think it's Chay's.

Up the Noran Water
The country folk are kind;
An' wha the bairnie's daddy is
They dinna muckle mind.
But oh! the bairn at Annie's breist,
The love in Annie's e'e --
They mak' me wish wi' a' my micht
The lucky lad was me!

Other Poems of Interest...

Home: PoetryExplorer.net